मातृभाषा शिक्षाया छगू पुलांगु माग

नेवाः लगायत देय्या थीथी मांभासं शिक्षा बीगु ज्याय् सक्रिय जुयाच्वंपिं भाषिक कार्यकर्तातय् छगू पुचलं उकुन्हु शिक्षामन्त्री गंगालाल तुलाधरयात नापलानाः हरेक स्कूलय् मातृभाषा विषय ब्वंकेगु व्यवस्था यायेत इनाप याःगु दु। वय्कःपिंसं मन्त्री तुलाधरयात याःगु इनाप उलि तःधंगु मखु। वय्कःपिंसं थुलि हे जक इनाप याःगु खः कि स्कूलय् ब्वनीपिं विद्यार्थीतय्त ऐच्छिक विषय कथं तयातःगु थीथी मातृभाषाया विकल्पय् भाषा विषय हे तया बीमाल, विज्ञान, कम्प्युटर थेंज्याःगु विषय तया बी मजिल ।

थ्व वास्तवय् छुं हे तःधंगु माग मखु। मन्त्रालय मखु, थ्व ला पाठ्यक्रम विकास थेंज्याःगु छगू विभागं जक याःसां गाःगु ज्या खः। तर थुलि चीधंगु माग छगू पूवंकेगुपाखे नं थ्व देशय् सुयां ध्यान वनाच्वंगु मदु। भाषा सम्बन्धी ऐच्छिक विषय ल्ययेबलय् विकल्पय् विज्ञान, अतिरिक्त गणित थेंज्याःगु विषय तये मजिल धकाः माग जुयाच्वंगु कमसेकम नं स्वीदँ दयेधुंकल। छगू विभागीय निर्णयपाखें याये फइगु थज्याःगु चीधंगु ज्या याना बी माल धकाः वंगु स्वीदँ न्ह्यवंनिसें माग जुयाच्वनं नं राज्यं पूवंका मबिउ। आदिवासी जनजातिया थुलि चीधंगु माग छगू पूवंकेत ला थौंया राज्य व्यवस्था तयार मदु धाःसा मेमेगु माग थुमिसं पूवंकी धकाः आशा यायेगु बेकार हे जुइ। वास्तवय् थ्वहे कारणं आदिवासी जनजातिया समग्र विकासया ज्या न्ह्याकेगु खःसा जातीय आधारय् स्वशासन मदयेकं मगाः धयाच्वंगु खः। जनजातिया लागाय् जनजाति थःपिंसं हे शासन याये खन कि तिनि उमिसं थःत माःगु ज्याखँ थःपिंसं हे याये फइ। उकिं हे थौं सकलें जनजाति थुकी अडिग जूगु खः। जुइ हे माः ।

More Stories Like this