संविधानसभा पिने धर्ना पसल्यातय्त धाःसा मर्का

रश्मी नापित

खय्त ला देश विकासया निंतिं बल्लाके माःगु आर्थिक पक्ष हे खः।तर देशय् न्ह्यानाच्वंगु थीथी गतिविधिं झीगु आर्थिक ख्यः झन झन स्यना वनाच्वंगु दु। थौंकन्हय् दकलय् चर्चा जुयाच्वंगु विषय जेष्ठ १४ गतेया संविधान हे खः। थःगु स्वार्थया निंतिं राजनीति यानाच्वंपिं नेतातय्सं क्वःछिनातःगु इलय् हे न्हूगु संविधान दयेकी धकाः आः जनतां नं पत्याः मयायेधुंकल। आः जेष्ठ १४ लिपा छु जुइ धयागु खँय् हे अप्वः चर्चा जुयाच्वंगु दु। न्हूगु संविधान दयेके धकाः जनतायात विश्वासघात याइपिं नेतातय्सं संविधान पित बीगु इलय् संविधानया मस्यौदा जक जूसां पित बी धाःगु दु तर जनतां धाःसा नेतातय्त उलि खँय् नं विश्वास मयायेधुंकल। आः सरकारं संविधान दयेकेगु निंतिं मेगु दछि म्याद तनेगु प्रस्ताव तःगु दु। थःपिंसं हे तःगु प्रस्तावित इलय् नं न्हूगु संविधान पूवनीगु खः वा मखु धयागु खँय् जनतां शंका यानाच्वंगु दु। अले न्हूगु संविधान याकनं दयेके बीगु निंतिं नेतातय्त दबाव बीगु ज्या नं जुयाच्वंगु दु। थुकथं हे दबाव बीगु झ्वलय् सहभागितामुलक, समावेशी व समानुपातिक प्रतिनिधित्व सुनिश्चित जूगु महिला मैत्री संविधान क्वःछिनातःगु इलय् हे पित बीगु निंतिं मिसा पुचलं माग यानाच्वंगु दु ।

न्हय्गू मिसा पुचःया सञ्जालं वंगु वैशाखं निसें हे दबाव ज्याझ्वः न्ह्याका वयाच्वनागु जानकारी बिउगु दु। 'संविधानया निंतिं मिसा सञ्जाल' नांया उगु सञ्जालं संविधानया कार्य योजना व स्पष्ट खाका नेतातय्सं बीमाःगु माग यासें संविधानसभाया पिने धर्ना हे बियाच्वंगु दु। उमिसं इलय् हे ज्या पूवंके मफुपिं नेतातय्सं जनतायाके माफी फ्वने माःगु माग नं यानाच्वंगु दु। नेतातय्त उमिगु दायित्व लुमंका बीगु ताः तयाः उमिसं संविधानसभा पिने साँस्कृतिक ज्याझ्वः व सडक नाटक नं क्यनाच्वंगु दु। न्हय्गू मिसा पुचःया उगु सञ्जालं यानाच्वंगु उगु धर्ना ज्याझ्वः जेष्ठ १४ तक हे जारी जुइगु खँ उमिसं धाःगु दु।
संविधान इलय् हे जारी यायेमाः धकाः उमिसं यानाच्वंगु थ्व धर्ना सकस्यां निंतिं बांलाःगु ज्या खःसां वहे धर्ना जुयाच्वंगु जःखः तयातःगु स्थानीय व्यापारीतय् पसः धाःसा बांमलाक प्रभावित जुयाच्वंगु दु ।

स्वदँ न्ह्यवंनिसें न्हू वानेश्वरय् गिफ्ट पसः तयाच्वंम्ह सुनिलकुमार चौधरीं न्हापाया तुलनाय् थौंकन्हय् ४० प्रतिशत व्यापार म्हो जूगु खँ कनादीगु दु। मिसा सञ्जालं यानाच्वंगु साँस्कृतिक ज्याझ्वलं जुइगु हल्लां यानाः व्यापारय् नकारात्मक लिच्वः लानाच्वंगु खँ वय्कलं कनादी ।

अथे हे संविधानसभा भवन लागाय् च्वंगु एलिसा टाइम्स व आर.ए. अर्नामेन्टया थुवाःतय्सं नं मिसा सञ्जालं यानाच्वंगु धर्नाया कारणं थःपिनि व्यापार ५० प्रतिशत हे म्हो जुया वंगु खँ कंगु दु ।

मू लँया न्ह्यःने हे जुयाच्वंगु उगु धर्नाया कारणं लँजुवाःतय्त न्यासि जुइत हे थाकुयाच्वंगु मेगु समस्या खः। अथे हे थुकिं यानाः जुइगु सतक जामया ला झन खँ हे ल्हायेम्वाः। हल्लां यानाः गुलिखे मनूत लँय् वँवं हे तंचाया वनीगु खँ नं खनेदु ।

More Stories Like this