११ गते माओवादीया खबरदारी सभा व जन परिचालन

जनजातितपाखें १२ गते शक्ति प्रदर्शन व संविधानसभा घेराउ

येँ (झीगु स्वनिगः)

एकीकृत नेकपा -माओवादीं) जन परिचालन नापं खबरदारी सभा वइगु ११ गते बुधवाः यायगु जुगु दु । थ्वसिबें न्ह्यः १० गते यायेगु धयातःगु उगु ज्याझ्वः ११ गते यायेगु धकाः माओवादीं न्ह्यथंगु दु । माओवादीं येँ नापं देय्या मूमू शहरय् अथे खबरदारी नापं जनपरिचलन कथं तःजिक सभा यायेगु तयारी याःगु दु । शान्ति व संविधानया नितिं माओवादीं अथे जनपरिचालन यायेगु धकाः खँ क्वःछ्यूगु खः । जन परिचालनया नितिं वंगु १ गतेनिसें हे माओवादीं निरन्तर रुपं थीथी कथंया ज्याझ्वः प्रचारात्मक कथं यानाः वयाच्वंगु खः । शान्ति व संविधानया सवालय् माओवादीया आधिकारिक धारणा न्ह्यब्वइगु नापं प्रतिगामीतय्त खबरदारी याइगु उगु सभाया झ्वलय् स्वनिगःया हकय् येँया खुल्लामञ्चय् याइगु जूगु दु । उगु सभाय् एकीकृत माओवादीया नायः पुष्पकमल दाहाल प्रचण्ड नापं थीथी नेतातय्सं न्वंवानादी धकाः धाःगु दु ।

माओवादीं ११ गते अथे खबरदारी नापं जनपरिचालन सभा याइगु जुयाः आदिवासी जनजातिय्सं ११ गते यायेगु धयातःगु शक्ति प्रदर्शन नापं सविधानसभा घेराउ ज्याझ्वः जेठ १२ गते विहिवाः याइगु जूगु दु । नेपाःया आदिवासी जनजातितय्गु मंकाःगु मोर्चा आदिवासी जनजाति संयुक्त मोर्चां शक्ति प्रदर्शनया नितिं ब्यापक तयारी याःगु दु । स्वनिगःया थीथी लागां ब्यागलं ब्यागलं कथं आदिवासी जनजातिया सांस्कृतिक बाजं थानाः तःजिक जुलुस पिकयाः न्हूबानेश्वरया संविधानसभा लागाय् वनाः अथे संविधानसभायात घेराउ यायेगु ज्याझ्वः तयार याःगु दु । आदिवासी जनजाति संयुक्त संघर्ष समितिया म्हिगः आइतवाः च्वंगु मुँज्यां अथे १२ गते जक शक्ति प्रदर्शन नापं संविधानसभा घेराउ यायेगु धकाः क्वःछ्यूगु खः ।

न्हूगु संविधानय् जातीय पहिचान सहितया स्वायत्त प्रदेशत निर्माण यायेमाःगु माग यानाः आदिवासी जनजातिय्सं अथे आन्दोलन यानाः वयाच्वंगु खः । थ्व हे झ्वलय् आदिवासी जनजातिय्सं थौं सोमवाः मूमू राजनीतिक पार्टीया केन्द्रीय ज्याकुथिइ धर्ना च्वनेगु नापं ज्ञापन पौ बिइगु ज्याझ्वः नं तयातःगु दु । एकीकृत माओवादी, नेपाली कांग्रेस व एमालेया केन्द्रीय ज्याकुथिइ उगु हे पार्टीया जातीय मोर्चा, खलः पुचःया नेता कार्यकर्तातय्सं अथे पार्टीया केन्द्रीय ज्याकुथिइ धर्ना बिइगु जूगु दु । धर्ना नाप नापं शीर्ष नेतातय्त ज्ञापन पौ बिइगु ज्या नं जुइ धकाः आदिवासी जनजाति संयुक्त संघर्ष समितिं धाःगु दु ।