'संघीयता विरोधी डिजाइन’
नेपाःया अदिवासी जनजातितय्गु मंकाःगु संघर्ष समिति आदिवासी जनजाति संयुक्त संघर्ष समितिपाखें म्हिगः आइतवाः छगू प्रेस विज्ञप्ति जारी यानाः थौंकन्हय् संघीयताया विरोधीतय्सं ग्रायण्ड डिजाइन यानाः क्षेत्री व ब्रम्हू समुदायया नामं थीथी कथंया गतिविधि यानाच्वंगुप्रति गम्भीर ध्यानाकर्षण जुल धकाः धाःगु दु । उगु संघर्ष समितिइ दुथ्याःगु ३० गू घटक संगठनपाखें मंकाः कथं पिथंगु विज्ञप्तिइ धर्म निरपेक्षता, संघीयता, गणतन्त्र विरोधीतय्सं सदनय् दुपिं व सदय्न मदुपिं प्रतिगामी राजनीतिक दलतय्गु लिधंसाय् सतकय् म्वाःमदुगु कथंया गतिविधि संचालन यानाच्वन धकाः न्ह्यथंगु खः । सरकारय् दुपिं व सरकारय् मदुपिं दलत नापं एकात्मकवादी व यथास्थितिवादीतय्गु ग्वहालिं अथे संघर्ष धकाः यानाच्वंगु नापं राज्यया धकू तकं खर्च यानाच्वंगु दु धकाः विज्ञप्तिइ न्ह्यथंगु दु ।
अज्वःगु गतिविधि धैगु साम्प्रदायीक ल्वापु तच्वयेकेगु नितिं जुयाच्वंगुलिं छुं जुयाः अपि्रय घटना जुल धाःसा उकिं लाइगु लिच्वःयात सम्वन्धित निकायपाखें हे जिम्मेवारी कायेमाली धकाः तकं ख्याच्वः बियातःगु दु । आदिवासी जनजाति संयुक्त संघर्ष समितिइ नेवाः स्वायत्त राज्य मंकाः संघर्ष समिति, नेपाल आदिवासी जनजाति महासंघ, ताम्सालिङ संयुक्त संघर्ष समिति नापं नेपाःया आदिवासी जनजातितय्गु थीथी मोर्चात दुथ्यानाच्वंगु दु ।
