बन्दया विरोधय् मोटरसाइकल र्याली
फोहरया, अस्पतालया गाडी तोडफोड, सलंसःम्ह ज्वंगु दावी
श्रीकृष्ण महर्जन
थीथी कथंया क्षेत्रीतय्गु नामं म्हिगः आइतवाः जातीय पहिचान सहितया स्वायत्त प्रदेशया विरोध यानाः आह्वान याःगु स्वनिगः बन्दया झ्वलय् पर्यटन ब्यवसायीतय्सं अवज्ञा यानाः मोटरसाइकल र्याली तकं पिकाल । म्हिगः सुथ न्हापां सार्वजनिक यातायात तकं संचालन जूगु खःसां लिपा क्षेत्री समाजया थीथी मनूत सतकय् क्वहां वयाः एम्बुलेन्स, अस्पतालया गाडी तकं तोडफोड याःगु खःसा ८ बजे लिपा धाःसा सार्वजनिक यातायात बन्द जूगु खः । मोटरसाइकल व निजी गाडी धाःसा संचालन जूगु खः । अथे बन्दया कारणं सर्वसाधारणया जनजीवन प्रभावित जूगु खः । मूमू बजाः बन्द जूगु खःसा शिक्षण संस्था तकं बन्द जूगु खः । परिक्षा दुपिं विद्यार्थीतय्गु नितिं धाःसा यातायात संचालन मजुया समस्या ब्वलंगु खः । बन्द आह्वानकर्तातय्सं यलया बालकुमारी लागाय् त्रिविवि शिक्षण अस्पतालया बा १ प ३५९४ नम्बरया बस तोडफोड यानाब्यूगु दु । अथे बसय् आक्रमण याःगु झ्वलय् अस्पतालया कर्मचारी विक्रम गजुरेल घाःपाः जूगु दु । अथे हे ग्वंगःबुँ लागाय् बा १ ख ५४५५ नम्बरया फोहर ल्ह्यइगु गाडी तोडफोड यानाब्यूगु दु । अथे हे तोखा, महाराजगन्ज व न्हूबानेश्वरय् मोटरसाइकल तोडफोड यानाब्यूगु दु धकाः ट्राफिक प्रहरीं धाःगु दु ।
ग्वसाः खलःया खँय् विवाद
बन्द आह्वान याःगु क्षेत्रीतय्गु थीथी खलः पुचःया सवालय् धाःसा जस कायेत विवाद ब्वलन । संचार माध्यमय् थीथी खलः पुचलं थःथःपिन्सं बन्द यानागु धकाः दावी याःगु दु । क्षेत्री समाज नेपालं थःपिन्सं बन्द आह्वान यानागु खः धकाः धाःगु दु । अथे हे बन्द आह्वान यानागु धकाः दावी याःगु संयुक्त क्षेत्री राष्ट्रिय आन्दोलन परिचालन समितिइ दुथ्याःगु प्यंगू घटकयात धाःसा क्षेत्री समाज नेपालं थःपिन्सं कारवाही यानाः पितना छ्वयागु पुचःतय्गु मोर्चा खः उकिं इमिगु बन्द मखु धकाः दावी याःगु दु । अथे हे क्षेत्रीय राष्ट्रिय महासंघपाखें नं थःपिन्सं बन्द आह्वान यानागु खः धकाः दावी याःगु दु । बन्दया झ्वलय् सलंसःम्ह प्रदर्शनकारी कार्यकर्तातय्त ज्वनाः यंकूगु दु धकाः संयुक्त क्षेत्री राष्ट्रिय आन्दोलन परिचालन समितिया कजि कुमार बहादुर थापां दावी यानादीगु दु । थ्व हे झ्वलय् पर्यटन ब्यवसायीतय्सं येँया थबहि लागां बन्दया विरोधय् मोटरसाइकल र्याली पिकाःगु दु ।
