कांग्रेसया मुख्य निशाना आः माओवादी जक

ताः ई लिपा नेपाली कांग्रेसं शुक्रवाः राजधानीइ येँय् याःगु जनप्रदर्शन व सभापाखें देय्या प्रजातन्त्रवादी खेमाया दथुइ तःधंगु आशा ब्वलंका बिउगु दु। गिरिजाप्रसाद कोइरालाया निधन व वयां लिपा पार्टी दुने ब्वलंगु आन्तरिक कचवनं यानाः कांग्रेस संकुचन जुजुं वंगु खः लाकि धकाः चिउताः तयाच्वंपिं मनूतय् दथुइ कांग्रेसया उगु सभां तःधंगु आशाया जः नं ह्वला बिउगु दु। खास यानाः देशय् माओवादीया उदय जुइधुंकाः चिन्तित जुयाच्वंपिं माओवादी विरोधी शक्ति व जनताया दथुइ शुक्रवाःया कांग्रेस भेलां तःधंगु हे उर्जाया संचार याना बिउगु खनेदु। शुक्रवाःया भेलां कांग्रेस हाकनं छक्वः दना वःगु व देशय् छुं याइ लाकि धकाः आशा तयेगु थाय् नं पिकया बिउगु दु।
कांग्रेसया उगु अभियानया सम्पूर्ण भाषण माओवादीया विरोधय् केन्द्रित खनेदुगु खः। कांग्रेसया उगु सभा स्वयेबलय् सीदु, कांग्रेसं आः थःपिनि प्रमुख शत्रु शक्तिया रुपय् माओवादीयात निशाना दयेकूगु दु। थःगु पुलांगु शत्रु शक्ति एमाले बारे कांग्रेसं छुं हे न्वमवाः। उकुन्हु न्ववाःपिं फुक्क हे वक्तातय्सं माओवादीयात हे निशाना दयेकाः बिचाः प्वंकादीगु खः ।

कांग्रेसं माओवादीयात निशाना दयेकूगुयात अनेक अर्थय् थुइकेमाःगु खने दइ। थ्व वास्तवय् छगू पार्टीं मेगु पार्टीया आलोचना याःगु जक खँ मखु। कांग्रेसय् गिरिजाप्रसाद कोइराला मदये धुंकाः माओवादीयात स्वयेगु दृष्टिकोणय् वःगु थ्व छगू तःधंगु हिउपाः खः। माओवादीं देशय् आमूल परिवर्तनया आपालं एजेण्डात न्ह्यःने हःगु दु। कांग्रेसं हःगु बिचाः उगु एजेण्डाया विरोधी बिचाः नं खयेफु ।

More Stories Like this