बन्दं जनजीवन प्रभावित

येँ (सन्ध्या टाइम्स)/क्षेत्री जातिया थीथी पुचःतय्सं याःगु स्वनिगः बन्दं यानाः थौं येँ, यल व ख्वप जिल्लाया जनजीवन प्रभावित जुल। बन्दया कारणं थौं शिक्षण संस्था पूर्ण रुपं ठप्प जूगु दुसा पसः, बजाः आदि धाःसा आंशिक रुपं जक चालाच्वंगु दु ।

थौं सुथय्पाखे सफा टेम्पो चले जुइधुंकूगु खःसां लिपा बन्दकारीत पिहां वयाः यातायात बन्द याकूगु खः। अथे खःसां मोटरसाइकल धाःसा चले जुयाच्वंगु खनेदु।
चले जुयाच्वंगु सवारी साधन बन्द याकः वयाच्वंपिं सछिम्ह बन्दकारीतय्त थाय्थासं ज्वना यंकूगु खँ प्रहरीं धाःगु दु। बन्दया खास आयोजक सु धइगु पत्ता लगे मजूगुलिं ज्वंपिं कार्यकर्ता नं सुयागु खः धइगु सी मदुनि।
बन्दं यानाः स्वनिगलं पिने वनेगु सवारी साधन बन्द जूगुलिं पिने जिल्ला नं प्रभावित जूगु दु ।

बन्दया ग्वसाः खलः बारे अन्यौल
थौंया स्वनिगः बन्द सुयागु आह्वानय् जूगु खः? सर्वसाधारण जक मखु स्वयम् ग्वसाः खलकं तकं थ्व खँ धाये मफुनि। थौंया बन्द थःपिनिगु ग्वसालय् जूगु खः धकाः क्षेत्री जातिया थीथी संस्थातय्सं दावी याःगु कारणं बन्दया ग्वसाः खलः सु धइगु खँय् हे अन्यौल ब्वलंगु खः।
क्षेत्री जातिया थीथी संगठनत छगुलिं मेगुया अस्तित्व तकं स्वीकार मयासे न्ह्याः वनाच्वंगु दु। क्षेत्री समाज नेपाल नांगु संस्थां थःपिंसं घोषणा याना तयागु देय्न्यंकं बन्दया झ्वलय् थौंया बन्द जूगु खः धकाः दावी याःगु दुसा खस क्षेत्री एकता समाज नांगु मेगु संस्थां थौंया बन्द थःपिंसं यानागु खः धकाः दावी याःगु दु ।

अथे हे क्षेत्री राष्ट्रिय आन्दोलन समितिं नं थौंया बन्द थःपिनिगु ग्वसालय् जूगु खः धकाः दावी याःगु दुसा संयुक्त क्षेत्री राष्ट्रिय आन्दोलन परिचालन केन्द्रीय समितिं नं थौंया बन्द दावी याःगु दु। उकथं हे क्षेत्री राष्ट्रिय महासंघं नं थौंया बन्द थःपिंसं यानागु खः धकाः दावी याःगु दु ।

क्षेत्री समाज नेपालया महासचिव कुमार खड्कां थःपिंसं कारवाही यानापिं मनूत हे थौंकन्हय् संयुक्त क्षेत्री राष्ट्रिय आन्दोलन परिचालन केन्द्रीय समिति नां तयाः न्ह्यःने वःगु खः धासें उगु संगठनं गुगुं हालतय् नं थौंया बन्द याःगु मखु धयादीगु दु ।

अथे हे आन्दोलन परिचालन केन्द्रीय समितिया कजि कुमार बहादुर थापां धाःसा बन्द मेपिंसं मखु थःपिंसं हे यानागु खः धकाः दावी यानादीगु दु। बन्दया ग्वसाः खलः थःपिं हे खः धकाः थौं सुथंनिसें हे क्षेत्री जातिया थीथी खलः पुचःतय्सं स्वनिगःया थीथी सञ्चार माध्यमय् फोन यानाः बन्द जस कायेगु कुतः यानाच्वंगु दु ।

एम्बुलेन्स नं तोडफोड
बन्द आह्वानकर्तातय्सं थौं सुथय् एम्बुलेन्स नापं अस्पताल, फोहरया गाडी तकं तोडफोड याःगु दु। यल बालकुमारी लागाय् शिक्षण अस्पतालया बा. १ प ३५९४ नम्बरया गाडी तोडफोड याःगु दुसा बसुन्धाराय् नम्बर सीके मफुगु छगः एम्बुलेन्स, महाराजगन्जय् फोहर ज्वना वंगु गाडी तोडफोड याना बिउगु दु ।

सितिकं नकेत दबाव
बन्द आह्वानकर्ता क्षेत्रीतय्सं बन्द याकेत स्वनिगः पिनें वयाच्वंपिं थः कार्यकर्तातय्त सितिकं नकेगु व च्वनेगु ब्यवस्था यायेत स्वनिगःया होटल व गेष्ट हाउस संचालकतय्त दबाव बिउगु दु ।

येँया लुँहिति, ग्वंगःबुँ, नयाँ बसपार्क, बागबजाः नापं थीथी लागाय् चायेकातःगु होटल ब्यवसायीतय्त क्षेत्री समुदायया बन्द आह्वान याःगु संस्थाया नेतातय्सं वयाः अथे दबाव बियाच्वंगु खँ सीदुगु दु ।