बज्रबाराही सांस्कृतिक पर्यटन मेला न्ह्यात

टिस्टुङ्ग (झीगु स्वनिगः)

टिस्टुङ्ग बज्रवाराही नेवाः पुचःया ग्वसालय् दक्ले न्हापां टिस्टुङ्ग बज्रबाराही सांस्कृति पर्यटन मेला न्ह्याःगु दु । पर्यटनमन्त्री खड्ग बहादुर विश्वकर्मां म्हिगः सुथय् छगू विशेष ज्याझ्वःया दथ्वी उद्घाटन यानादीगु खः । उद्घाटनया झ्वलय् पर्यटनमन्त्री विश्वकर्मां जेठ १४ गते दुने संविधान पित महल धाःसा जनतां आन्दोलन न्ह्याकेगु धयादिसें वयकः नं जनता दयेकूगु वर्तमान सरकारयात सुनांनं क्वथले मफैगु धयादीगु दु । उगु झ्वलय् पर्यटन विकास वोर्डया मणिराज लामिछाने व रामनाराण विदारी लगायत व्यक्तिपिसं नुगः खँ तयादीगु खः । थीथी राजनीतिक दलया प्रतिनिधि ग्वसाःखलया प्रतिनिधि व चुन्दा वज्राचार्य लगायत व्यक्तिपिं पाहांकथं झायादीगु खः । ज्याझ्वलय् नरदेवी कलचर सेन्टरं सांस्कृतिक ब्वज्या व सिपालतय्गु बाजं नं न्ह्यब्वःगु खः । मुंज्या विनोदया नायः सुइ न्ह्यायगु उगु ज्याझ्वलय् लसकुस इन्द्रवहादुर श्रेष्ठ यानादीगु खः । थनिनिसें न्ह्याःगु उगु मेला ८ व ९ गते यानाः जम्मा स्वन्हु न्ह्याइगु धाःगु दु । मेलायात थीथी संघ संस्थां नापं ग्वाहालि यानादीगु खः ।