१२ वाःया दुने शान्ति प्रक्रिया निष्कर्षय्

४८ हप्ताया दुने संविधान जारी यायेगु सरकारया कार्यतालिका

येँ (झीगु स्वनिगः)

वर्तमान सरकारं सहमतिया नितिं झिंनिवाः -१२ हप्ता) या दुने शान्ति प्रक्रिया पूवंकेगु निष्कर्ष पिकासें ४६ हप्ताय् न्हूगु संविधान जारी यायेगु न्हूगु कार्यतालिका तयार याःगु दु । एमाले संसदीय दलया मुख्य सचेतक भीम आचार्यं म्हिगः शनिवाः येँय् सरकारी कार्यतालिका सार्वजनिक यानादीगु खः । रिपोर्टर्स क्लबय् साक्षात्कार ज्याझ्वलय् वय्कलं अथे सार्वजनिक यानादीगु खः । आचार्यं सार्वजनिक यानादीगु न्हूगु कार्यतालिका कथं जेठ १४ गतेलिपाया प्यवाःया दुने सेना समायोजनया मोडालिटी तयार यायेगु, प्याकेज तयार यायेगु कथं व 'रिगुरपिङ' सुरु याइ ।

अथे हे संविधान निर्माणया सन्दर्भय् उगु ईया दुने संविधान दयेकेगु सवालय् विवाद जुयाच्वंगु विषयसं संवैधानिक समिति व उप समितिइ सहमति यायेगु ज्या जुइ । अनंलिपाया प्यवाःया दुने 'रिगुरपिङ'या ज्या क्वचायेकेगु व संविधान निर्माणया सन्दर्भय् संवैधानिक समितिं गोप्य रुपं सहमतिया आधारय् संविधानया न्हापांगु एकीकृत मस्यौदा तयार याइगु जूगु दु । अथे हे अनं निवाः लिपाःया दुने समायोजनय् वनीपिं लडाकुयात ब्यागलं शिविरय् तयेगु व पुनःस्थापनाया ज्या क्वचायेकेगु जुइ धकाः सरकारं धाःगु दु । व हे ईया दुने संवैधानिक समितिं तयार याइगुु संविधानया एकीकृत मस्यौदायात संविधानसभाया पूर्ण मुँज्यांय् सहलह ब्याकेगु ज्या जुइ । अथे हे दलिय आधारय् सहलह यानाः हिइकेमाःगु जुल धाःसा हाकनं सहलह ब्याकाः संवैधानिक समितिइ छ्वयेगु कार्यतालिका दुगु एमालेया मुख्य सचेतक आचार्यं धयादीगु दु ।
अथे हे अनंलिपाया निवाःया दुने सेना समायोजन व पुनस्थापना सम्वन्धी फुक्क ज्यात क्वचायेकेगु व संविधान निर्माणया सन्दर्भय् संविधानया न्हापांगु मस्यौदायात जनताय् छलफल चलेयायेत राजपत्रय् प्रकाशित यायेगु ज्या क्वचायेकेगु जुइ धाःगु दु ।

आचार्यं अनंलिपाया १२ हप्ताय् न्हापांगु मस्यौदाय. सुनवाई व अन्तक्रिर्या यायेगु व सुझाव संकलन यानाः अभिलेख तयार यायेगु, अनंलिपा स्ववाःया दुने जनताया राय सुझाव सम्वन्धी विस्तृत प्रतिवेदन तयार यानाः संविधानसभाय् प्रस्तूत यायेगु, अनंलिपा छवाःया दुने जनताया सुझाव सम्वन्धी प्रतिवेदनय् पूर्ण बैठकय् सहलह ब्याकेगु, अनं नं लिपा निवाःया दुने पूर्ण बैठकया निर्देशन कथ. मस्यौदा तयार यानाः विधेयक सभाय् पेश यायेगु व फुक्क दुजःतय्त विधेयकया प्रति पेश यायेगु, अनंलिपा निवाःया दुने सभासद्तय्त विधेकया संशोधन पेश याके बिइगु व संविधानसभाय् सैद्धान्तिक छलफल न्ह्याकेगु ज्याझ्वः दु धकाः वय्कलं जानकारी बियादीगु दु । वर्तमान सरकारया योजना कथं ल्यं दुगु प्यवाःया दुने विधेकयात कयाः संशोधन प्रस्तावयात २८ दलया सहमतिया कुतः यायेगु, अनंलिपा ८ हप्ता विधेयकया प्रत्येक बुँदाय् दफावार सहलह ब्याकाः संविधानसभां पारित यायेगु व ल्यंदुगु अन्तिम निवाःया दुने संविधानया प्रमाणिकरण यायेगु औपचारिक रुपं राष्ट्रिय समारोह यानाः संविधानसभाया नायः सुवासचन्द्र नेम्वाङं राष्ट्रपति डा. रामवरण यादवयाथाय् पेश यानादीगु नापं व हे सभापाखें संविधान जारी यायेगु तयारी याःगु दु । थ्व हे दथुइ जेठ १४ गतेया दुने फुक्क शिविरय् कर्मचारी छ्वयाः विशेष समितिया पूर्ण मातहतय् हयेगु ज्या क्वचायेकेगु दावी नं आचार्यं याःगु दु ।