अन्तर्वार्ता [बाखं]

प्राज्ञ सुलोचना मानन्धर

"ए बाःम्ह झ् ए बाःम्ह !" स्वाहाने गये न्ह्यः छगू सः जिगु न्हाय्पनय् द्यूवल । एकनासं सःताच्वंम्ह छम्ह मिसाया सलं जिगु म्ह पीसे च्वन । सः स्वस्थ मजू । मफयाः ग्वारा चिनाच्वंम्ह वा नकतिनि गनं दयाः दने मफयेवं ग्वाहालि फ्वनाच्वंम्हेसिगु सः थें च्वं । जि छम्ह पत्रकार । पत्रपत्रिकाय् न्हूगु छुं इस्यू पिकायेत नांदंपिं नेतातय्गु छेँया स्वाहाने गः जुइमाःम्ह ।

छगू नांदंगु पार्टीया नेता पूर्णशेखर भाजुया छेँ । मेबलय् लुखांनिसें हे लसकुस यायेत वइपिं नं दु । थ्व इलय् छाय् खः सुनसान । खापा चाः । मू लुखाय् च्वंम्ह पालें जितः अःपुक हे दुने छ्वल, बरोबर वइम्ह पत्रकार धकाः नं जुइफु । जि दुहांवनाः स्वाहाने छपलाः जक तयाः । जिगु न्हाय्पनय् सलं थ्यूवल - "ए बाःम्ह !"

जि वाताहां च्वनाः । पलाः मन्ह्याकुसे छपलाः क्वय् हे च्वनाः न्यना । सः मदिक्क वयाच्वन - "ए बाःम्ह ! जितः लः छकः हयादिसँ ले ..... ए बाःम्ह !"
सुयांगु नां कयाः सःताच्वंगु मदु । छगू हे नां "ए बाःम्ह !’

आः जितः पक्का जुल । छम्ह मफुम्ह मिसां थः भाःतयात लःया निंतिं सःताच्वन । ग्वाहालि फ्वनाच्वन । भाःतम्हं वयागु सः मताः वा छुं मेगु महत्वपुर्ण ज्याय् व्यस्त ।

जिं पलाः न्ह्याका । छतँ मेगु तँय् पलाः तया । छाय्धाःसा फोनय् ई कयाः जक जि थ्व छेँय् वयाम्ह खः । मखुसा थ्व स्वाहानय् पलाः तयेत जितः आँत नं गनं वइ ! अपाय्धंम्ह नेताया छेँय् !

जिं धाये धुन जि छम्ह पत्रकार । जिगु झोलाय् टेपरेकर्डर दु । अले क्यामरा छगः, नोटबुक व कलम छपु । पूर्णशेखरजुया भाषण तःकः न्यने लं । मिसा समानताया पक्षधर वय्कः । तसकं सम्वेदनशीलम्ह । मानवतावादी मनू ताः । उकिं नं जि वय्कःया अन्तर्वार्ता कायेत थ्व छेँया स्वाहाने गः वनाम्ह खः । थुगुसी वय्कःनाप खँ ल्हायेगु विषय व न्ह्यसः नोटबुकय् नोट यानागु खः ।

- झी नेताज्यूया थुगुसी समावेशी निर्णय यायेत छिगु पार्टीं गुलि ज्या न्ह्याके धुंकल ।
- न्हूगु नेतृत्वया निंतिं छिगु पलाः व भूमिका गुकथं जुइ ?
- अले राजनीति जक ला कि समाज विकासयात छुं कथंया योजना दु ?

नापलायेवं न्यनेगु जिगु न्ह्यसःत खः थुपिं । मतिइ तयाः नुगलय् हे होमवर्क याये थें ब्वनागु दु ।
स्वाहाने गय् न्ह्यः तायेदुगु थ्व सलं जिगु 'होमवर्क’ यात हुयाबिल । मेगु हे न्ह्यसः दनावल । छु जुयाच्वन थ्व छेँय् । मखु थाय् ला वयाच्वनागु मखु ला ? छुं न्हूगु समस्या दु थ्व छेँय् । राजनीतिक समस्यासिबें तःजिगु जीवनया समस्या दु थन । लः त्वने प्याःचाःम्ह, मफुम्हेसिगु सः दु थन । तर थ्व छेँया नायः - नेता वा मेपिं जःपिंसं छतिं न्यनाच्वंगु मदु थ्व सः ।

थ्व सः झन् झन् चिसः जुजुं वनाच्वंगु दु । लिसः ब्यूपिं सुं मदु । छु कोथां थ्व सः पिहां वयाच्वन धयागु जिं मस्यू । भराय् खाःगु छेँ ! गनं वयाच्वन थ्व पीडित सः !

जि सरासर थहांवना । भाजु पूर्णशेखरयात नापलायेगु बैठकय् थ्यन । च्वतय् । स्वाहाने थहां वंतले सुं हे लँय् नाप मलाः ।
व हे छगू सः 'ए बाः’ ! ए बाःम्ह ! लः छकः हयादिसँ धयां ....’
सः ख्वखना सलय् हिले धुंकल । लिसः गनं मवः ।
नेता भाजुया बैठकय् थ्यन । वय्कलं जितः बियादीगु ई नं अंगः घडिं क्यनेधुंकल - न्हिनसिया स्वताः, गुगु नकतिनि हे पूगु जुयाच्वन ।

जि लुखाय् झ्वात्यां दना छझाः । खापा चाः । लाकां त्वःताः कोथाय् दुहां वनेत । नेताया सः कोथां पिहां वयाच्वन ।
"हस् ...... हस् ...... हुन्छ । त्या कुरा तुरुन्तै हुन्छ ...... ढुक्क हुनुहोस्" आदि आदि । छखेया वान-वे सः जक तायेदु ।

फोनय् प्राइभेट खँ नं जुइफु । अनुमति मकासे सरासर दुहां वनेगु आँट मवल । कोथाया लुखाय् छकः दिना । जिं अन्दाज याना, नेता फोनय् छम्ह मेम्ह नेतानाप महत्वपुर्ण समसामयिक खँय् व्यस्त जुयाच्वंगु दु ! दुहां वने ला, दिना च्वने ला ! वा छु यायेगु ? जिं लुखाय् सः बियाः । अहँ ! वय्कःया छुं प्रतिक्रिया मदु । न्हाय्पं फोनय् दिनाच्वंगु जुयाच्वन । जिं कोथा दुने छ्यं दुछ्वयाः स्वया । कोथाय् याकःचाः पूर्णशेखर हे छम्ह जक । भचा दनाच्वना नं वय्कःपाखें छुं प्रतिक्रिया मवयेवं जितः हाकनं व हे सलं साल ।

जि तलय् थ्यने धुंकाः जिं सिल, व 'ए बाःम्ह !’ सः कुने मातं कोथां वयाच्वंगु । जि ला च्वतय् थ्यनेधुंकल ।
जि भचा दना । "सर ! ...... पूर्णशेखर सर ! ......" छसः-निसः सःताः ध्यान थुखे सालेत । अहँ पूर्णशेखरजुं ताःगु हे मखु । न्ह्यःनेसं वनाः सतागु सः ला मताःसा कुने मातं कोथा दुने च्वनाः सःताच्वंगु "मफु सः’ झन् गनं तायेकेफइ !

लाकां त्वःते धुन । दुहां वने ला, कुहां वने ला ! कोथापतिं ध्याक्ध्याक् यानाः मेपिं छेँजःपिं माले ला वा "ए बाःम्ह !’ धयागु सलं सःताच्वंम्ह मफुम्ह मिसायात नापलाः वने । जितः अन्यौल जुल । अपाय्धंम्ह नेता पूर्णशेखरया आज्ञा मदयेकं कोथाय् दुहां वनेत जितः भचा आँट हे मवल ।

जिगु विवेकं जितः धाल व लः फ्वनाच्वंम्ह मफुम्ह न्ह्याम्ह हे थजुइमा, न्ह्याम्होसित सःताच्वंगु थजुइमा, अन छकः दुस्वयेगु बेश जुइ । वयात लः माःगु दु । वयागु सलय् आपत्ति दु ...... हथाय् दु ।

उकिं जिं जितः वास्ता मयाःम्ह नेतायात फोनय् तुं खँ ल्हाके बियाः हाकनं लाकां न्ह्यानाः छपु स्वाहाने कुहां वना । झन् सः प्रष्ट जुजुं मातंया नं ध्याकुने च्वंगु कोथां वयाच्वंगु जिं तायेका । न्ह्यःने वनाः । जिगु पलाः सः ताल जुइ, सः दित ।
न्ह्यःने वनाः छकः दिना । दुहां वने ला ? मवने ला ? छु याये छु याये जुल । सः बियाः लुखाय् दनाः ल्हातं ध्याक्ध्याक् याना ।

"अन सु थें ? जि ला बाःम्ह धकाः च्वनागु ?"
"जि सुनिल ! जि छम्ह पत्रकार । दुहां वयेज्यू ला थें ?"
"दुहां झासँ" लिसः वल ।

"ए सुनिल भाइ खनिं".... लासाय् ग्वारातुला च्वंम्ह मिसाम्ह पूर्णशेखरया जहान जुयाच्वन । न्हापा न्हापा वयेबलय् पूर्णशेखर नापं च्वनाः खँल्हाबल्हाय् ब्वति कयादीम्ह, अले फ्यतुइ मलाःनिबलय् उखेथुखे सुयातं अर्डर बियाः च्या-ख्येँय् आदि न्ह्यःने तयाबीम्ह जूगुलिं वय्कःनाप खँ ल्हायेत जितः छुं थाकु मजुल । तसकं मिले जूपिं त्यपु खः । उकिं जिं नमस्ते याना, "नमस्ते म्याडम ! म्हं मफु थें खः ला ?"

"जि थथे मफुगु लच्छिं मल्याये धुंकल ...... स्वाहानें दःगुलिं तुति निपां त्वःधुल । जँ नं संके मज्यू ...... थथे मेपिनिगु भरय् च्वने थाकु का । आः हे ज्या याइपिं नं सुं मदु । वय्कः (बाःम्ह) धाःसा गबलें छेँय् स्वये म्वाःम्ह, राजनीतिइ हे जक लगे जुयाच्वनादीम्ह, छुं मथू ।"

"मेमेपिं छेँजःपिं ग्व ले ? मखना नि !"
"काय् म्ह्याय् ब्वं वनाच्वन । तःधिम्ह भौ अफिसय् । लः छकः हयाबीपिं तकं मदु का थः मफुतं ...... ।" वय्कलं ख्वखना सलं धयादिल । मिखाय् ख्वबि छक्वलं लः लः धयावल मफुम्हेसिया मिखाय् । जिगु नुगः नं थुं दियावल ।
"जिं हयाबी नि लः, गन तलय् बइगलय् वनेमाली कि ...... ? गन सुयातं धाःसा जी ?" जिं छक्वलं धया ।
"मेथाय् वने म्वाः । आमकन टेबुलया च्वय् थरमसय् दइ । अन गिलासय् प्वंका ब्यूसां ज्यू ......"
जिं अथे हे याना ।

ल्हातय् लः बीत नं समस्या हे जुल । ग्वारातुला च्वंम्ह छम्ह बिरामीयात गथे यानाः गिलासया लः बीगु ? दकलय् न्हापांया थ्व व्यवहार ! गथे याःसा बांलाइ छुं मसिल ।

जि अकमक जुल । दनेमफुम्ह बिरामी । फ्यतुइ नं मफुगु जुयाच्वन । चम्चां जूसां लः म्हुतुइ तयाबी । गिलासया लः ज्वनाः चम्चा छपु माला ।

"चम्चा गन दइ ?" धकाः न्यना ।
"ग्व बाःम्हं गन तयाथकल थें ? अन हे दयेमाःगु खः ।"

"बाःम्होसित छकः सःतादिसँ ले भाइ !" वय्कःया सः न्यनाः जि हाकनं थहांवना । नेताज्यूया फोनय् खँ अझं सिमधनिगु जिं सिल । थुगुसी जिं जिगु न्ह्यसलं मखु कि वय्कःया छेँय् जुयाच्वंगु समस्या अले पीडित सः, लः फ्वनाच्वंगु सः अले जिं ग्वाहालि यायेत सनां नं ग्वाहालि बी मफुगु । ग्वाहालिया निंतिं छपु चम्चा मालां मलूगु खँय् दनाः न्ह्यः हे वनाः सः बिया- "पूर्णशेखरजु ! जि वयेधुन ।"

अझं मताः । जिं हाकनं जोडं सःताः ।
"पूर्णशेखर दाइ ! आः उखे मखु थुखे छकः स्वयादिसँ ......"

छ्यं हीकाः स्वयादिल । जितः खनाः छकः अंगःया घडी स्वयादिल । थ्वर ई जिगु निंतिं छयलीगु वा मखु धकाः जुइमाः। वा जि मखुगु इलय् थ्यन ला धकाः नं जुइमाः । फिस्स न्हिलादिल । ल्हाः भाय् यानाः न्ह्यःनेया सोफाय् फ्यतुइत उजं बियादिल ।

व उजं मन्यँसे जिं मेगु न्ह्यसः न्यना, "थन चम्चा छपु गन दइ ?"
नेता वाताहां जुल ।
उखे फोनय् "अब हामी अर्कोपटक कुरा गरौं । हस् त ..... भोलि ...... भोलि ...... हुन्छ ...... हस् ...... हस् ......" फोन तयाबिल ।

जिं अभिवादन याये हे ल्वःमन ।
हाकनं खँ थुइकेगु भावं न्यना, "थन चम्चा गन दु थें ? ......"

सर्न्दर्भ मदुगु खँ जुइमाः । पूर्णशेखरजी नं वाताहाँ जुल छझाः ।
"...... कुनय् म्याडमयात लः त्वंकेमाल ...... सःताच्वंगु ताउ जाल ...... ए बाःम्ह धकाः छितः हे सःताच्वंगु ...... ।"

खँ थुइवं वय्कः चम्चा मालेगु ज्याय् लगे जुल ।जिं धया "थौं सरनाप खँ ल्हाये मखुत, म्याडमं सःता च्वनादीगु दु । वय्कःयात हे ई बियादिसँ । जि हाकनं मेगु इलय् वये । सरया अन्तर्वार्ता कायेत ।"
जिं खँ दिका !

* * * * * * * *
थ्व छम्ह नेताया छेँय् छझाः च्वनाः अन्तर्वार्ता कायेत वंम्ह छम्ह पत्रकारं अनुभव यानागु खँ अन्तर्वार्ता मखु अन्तरछेँया बाखं च्वयाच्वना ।
छेँया जः मध्यय् दकलय् सत्तीपिं त्यपुया बाखं नं खः थ्व । बच्छि सर्गःया बाखं । बच्छि सर्गः घाइते जुयाच्वंगु बाखं । बच्छि सर्गः न्ह्यज्याकेत सम्पुर्ण ई बियाः तःजि यानाः थः मिजं जीवनपासायात द्यः भाःपाः । छकः सेखं जक चाःसां गणेद्यःयात मत बियाः जी ला, छकःपतिं क्वाःलः त्वंकाः जिल ला, म्हय् उसि उसि यानाः जी ला, मफुम्ह सिबय् अप्वः चिन्ता कया जुइ । छम्ह मिसा, बच्छि सर्गः !

अले थः मिजं सफल यायेत, अले थः छेँया नायःयात देशया नायः यायेत थःत सम्पुर्ण पानाः जिल ला, थःगु किचः तकं गनं खनेमदयेक नं थःत फुक्क पानाजुइपिं मिसापिं । तर थौं छम्ह मिसा मफयाः लासाय् च्वनाः लाय् लाय् बुनाः हालाच्वन नं लः छफुति म्हुतुइ तयाबीपिं सुं मदयाः ...... थः मनूयात मालाच्वन ......

ए बाःम्ह ! ए बाःम्ह ! धकाः सः सुइक सःता च्वन ।
थम्हं बुइकातःपिं मस्त नं पपु ब्वयेकाः अमेरिकाय् थ्यन ।
थौंया थ्व बाखं क्वचाल । थौंया निंतिं अन्तर्वार्ता नं थ्व हे जुल ।

छम्ह नेतां थः नापं च्वंम्ह, अर्धांगिनीया समस्यायात बांलाक थुइके मफुनिसा, सम्पुर्ण समाज, देय्या समस्या गुबले पूवंक थुइ । जिगु फुक्क न्ह्यसःया लिसः खः अन्तरव्यथा थ्व छेँया ! व्यवहारं ब्यूगु लिसः खः थ्व अन्तर्वार्ता !
थ्व अन्तर्वार्ता नं थनं हे क्वचाल !


साभार : बाखं दबू ल्याः ४।

More Stories Like this