कांग्रेसया शक्ति प्रदर्शन

येँ (सन्ध्या टाइम्स)/संविधानसभाय् शक्तिया ल्याखं निगूगु दल जुयाच्वंगु नेपाली कांग्रेसं थौं येँय् थःगु शक्ति प्रदर्शन याःगु दु। लोकतन्त्र व संविधानया निंतिं कांग्रेसं अभियान न्ह्याकेगु झ्वलय् थौं दकलय् लिपांगु ज्याझ्वः कथं शक्ति प्रदर्शन याःगु खः। स्वनिगः नापं स्वनिगः जःखःया कांग्रेस कार्यकर्ता तकं थौं येँया सतकय् वःगु दु। कांग्रेसं बानेश्वर, गौशाला, महाराजगन्ज, लैनचौर, त्रिपुरेश्वर, कलंकी, कालिमाटी नापं थाय्थासं जुलुस पिकयाः वयाच्वंगु दु ।

जुलुस खुल्लामञ्चय् थ्यंकाः सभा यासें क्वचायेकेगु ग्वसाः ग्वयातःगु दु। अथे थाय्थासं जुलुस पिकाःगुलिं येँया ट्राफिक ब्यवस्था तसकं प्रभावित जूगु दु। कांग्रेसं स्वनिगलय् जक हे १८ द्वः क्रियाशील कार्यकर्तात दुगुलिं थौंया शक्ति प्रदर्शनय् लखौं जनता सतकय् कुहां वइ धकाः कांग्रेसं दावी याःगु दु ।

थौंया उगु सभाया कजि नापं कांग्रेस येँ जिल्लाया सभापति भिमसेनदास प्रधानं थौंया ज्याझ्वः लोकतन्त्रवादीतय्गु शक्ति प्रदर्शन खः धकाः स्वीकार यानादीगु दु। उगु सभाय् कांग्रेसया सभापति सुशील कोइराला, वरिष्ठ नेता शेरबहादुर देउवा, संसदीय दलया नेता रामचन्द्र पौडेलं न्ववानादीगु ज्याझ्वः दु। उगु सभाय् कांग्रेसया नेतातय्सं थःपिं लोकतन्त्रया सवालय् सुंलिसे नं सम्झौता मयायेगु नापं म्हिगः जक कांग्रेसया केन्द्रीय कमिटीया बैठक च्वनाः संविधानसभाया म्याद थप यायेगु नितिं तःगु १० गू सर्त बारे न्ववाइगु जूगु दु। कांग्रेसया नेतातय्सं हतियार बराबर लडाकु समायोजन यायेमाःगु खँ न्ह्यथँसें थौंया खुल्लामञ्चपाखें प्यद्वः लडाकुयात जक थीथी सुरक्षा निकायय् समायोजन यायेमाःगु, २८ गू शिविरयात ७ गू शिविरय् क्वपाले माःगु, इमि कमाण्ड विशेष समितिइ हयेमाःगु, लडाकुया पुनर्वर्गीकरण क्वचायेकाः जक सुरक्षा निकायय् यंकेगु, इमित रेखदेख व निगरानीया जिम्मा सुरक्षा निकायपाखें यायेगु माग याइ। संविधानसभाया म्याद थप यायेत उगु सर्त थ्वहे जेठ १० गतेया दुने पूरा यायेमाःगु कांग्रेसं सर्तया रुपय् घोषणा याइगु जूगु दु ।

कांग्रेस 'राजधानी प्रदेश'या पक्षय्
राज्य पुनर्संरचना सम्बन्धी थःपिनि अवधारणा कांग्रेसं थौं खुलामंचं हे सार्वजनिक याइगु खँ सीदुगु दु। राज्य पुनर्संरचनाय् कांग्रेसं नेपाःयात ७ गू स्वयां अप्वः प्रदेशय् यंके मजिउगु बिचाः न्ह्यःने हःगु दु। कांग्रेसं उगु प्रदेशया नां गय् यानाः किटान यायेगु धकाः मधाःनिसां उकी जातीय रुपं जक विभाजन यायेगु खँ धाःसा मदु। नेवाःतय्गु हकय् धाःसा नेवाःतय्सं विरोध याना वयाच्वं थें 'राजधानी प्रदेश' धकाः नां तयेगु प्रस्ताव नं तयातःगु खँ सीदुगु दु। शासकीय स्वरुप धाःसा राष्ट्रपति शासन खः लाकि, प्रधानमन्त्री प्रणाली खः लाकि, संसदपाखें प्रधानमन्त्री ल्ययेगु खः धइगु निर्णय धाःसा अझं याये मफुनि ।