बल्ल दयेकेत्यंगु छगू परियोजना

ताःई लिपा बल्लबल्ल देशय् छगू जलविद्युत परियोजनाया शिलान्यास जूगु दु। खतुं थ्व सिधइगु मेगु प्यदँ लिपा जक खःसां थुकिं जनतायात धाःसा आः हे उत्साहया उर्जा बिउगु दु। न्हिंन्हिं हे ताःहाकःगु लोडशेडिंगया मारय् लाना च्वंपिं सर्वसाधारण जनतायात थुकिं तच्वकं आशावादी याना बीगु स्वाभाविक खः। थुगु तामाकोशी परियोजना आः तकया नेपाःया हे दकलय् तःधंगु जल विद्युत परियोजना जूगु, नेपाःमित थःपिंसं हे लगानी यानाः दयेकेत्यंगु व राष्ट्रिय सहमति कायम यानाः न्ह्यायेत्यंगु परियोजना जूगु ल्याखं थुकिया तःगूमछि हे महत्व दु ।

नेपाःमितय्सं थौं फयाच्वंगु गुगु लोडशेडिंगया मार खः, वपाखें छुं भचा जूसां मुक्ति धाःसा थ्व परियोजनापाखें जुइगु खनेदु। खतुं थौं झीसं गुगु लोडशेडिंग फयाच्वनागु खः मेगु प्यदँ लिपा थ्व अझ थपे जुइगु निश्चित दु। थ्व ल्याखं आः दयेकेत्यंगु तामाकोशी प्यदँया दुने हे निर्माण सिधल धाःसा नेपाःया लोडशेडिंग क्वपालेत जक ठिक्क जुइ। उगु इलय् तक थप निर्माण जुइगु उद्योग, कलकारखाना व थप मागया लागिं हानं मेगु परियोजनात दयेकेमाःगु आवश्यक जुइ।
च्वय्या तामाकोशीया थ्व परियोजना ज्या यायेत ला वंगु झिदँ न्ह्यः हे तयार जुइधुंकूगु खः। तर राजनीतिक खिंचातानी व मेमेगु कारणं यानाः ज्या न्ह्याके मफुत। आः राष्ट्रिय सहमति कायम यानाः दथु दथुइ जुइफइगु पंगःत समेत फुक्कं चीकाः ज्या न्ह्याके फत धाःसा जक थ्व प्यदँया दुने क्वचाइ। सम्पूर्ण नेपाःमितय् जनजीवन हे प्रभावित जुइक कायम जुयाच्वंगु लोडशेडिंग थुकिं चीकी धकाः आशा यायेफु ।

More Stories Like this