सुनसरीइ जनचेतना व अन्तरक्रिया ज्याझ्वः‏

नेवाः देय् दबू सुनसरी जिल्ला समितिया ग्वसालय् वंगु जेष्ठ ४ गते राष्ट्रिय जनगणना २०६८ विषयसं धरानय् छगू अन्तरक्रिया ज्याझ्वः जुल । देय् दबू सुनसरीया नायः सरला कायस्थया सभापतित्वय् जूगु उगु ज्याझ्वलय् नेवाः देय् दबूया नायः नरेश ताम्रकार, केन्द्रीय दुजः पुर्णकृष्ण श्रेष्ठ, बरिष्ठ साहित्यकार बद्री पालिखें, बरिष्ठ राजनीतिज्ञ कृष्णप्रसाद श्रेष्ठ नापं आपालं स्थानीय बुद्धिजीवीपिंसं व्वति का:गु खः ।

ज्याझवलय् नेवा देय् दबूया नायः ताम्रकारं नेपाल सरकार केन्द्रीय तथ्यांक विभाग पाखें याकनं हे न्ह्याकेत्य‌ंगु राष्ट्रिय जनगणना २०६८स देय् न्यंकया नेवाःतय्गु सही तथ्यांक पितमवीकेगु षड्यन्त्र जुयाच्वंगु खँ न्ह्यथनादिल । वय्कलं जनगणनाया नितिं गणक निसें कया मेमेगु सकतां प्राविधिक ख्यलय् नं गौर नेवाःतय्त नियुक्ति यायेगु ज्या जुयाच्वंगु खँय् विशेष सचेत जुयेमाःगु बिचा: प्वंकादिल । नापं वय्कलं जनगणना क्वचायेकाः नं नेवाःतय्त दमन यायेगु कथंया ज्याझ्वः न्ह्याकीगु सम्भावना दूगुलिं देय्न्यंकया नेवाःत व आदिवासी जनजातिपिं छधि-छप्पं
जुया वनेमाःगु खँय् बः बियादील ।

अथेहे वइगु जनगणनाय् सकल नेवाःतय्सं थःथःगु मांभाय्स नेवाः भाय्, जात वा जातिस नेवाः अले दोस्रो भाषास नापं स्वापू दूगु मेगु आदिवासी जनजातिया भाषा च्वयेगु व मेपिं जलखला आदिपासी जनजातिपिंत दोस्रो भाषास नेवाः भाषा च्वकेगु अभियान न्हृयकेमाःगु खँय् चेतना थनेगु नं उगु ज्याझ्वलय् जूगु खः ।

उखे इटहरीइ नं नेवाः पुचः इटहरीया ग्वसालय् वंगु जेष्ठ ४ गते जनचेतना ज्याझ्वः जुल । नेवाः पुचः इटहरी नापं मेगु च्यागू आदिवासी जनजातितय् जातीय खलः पुचःया प्रतिनिधिपिनिगु व्वति दूगु उगु ज्याझवः नेवाः पुचःया नायः चित्रमान प्रधानया सभापतित्वय् न्ह्यागु खः । ज्याझ्वलय् नेवाः देय् दबुया नायः नरेश ताम्रकारं विशेष पाहाँकथं व्वति कयादीगु खः । ज्याझ्वलय् सकल जातीय खलःपुचःया प्रतिनिधिपिं दथुइ थुगु दँया राष्ट्रिय जनगणनाय् सकल आदिवासी जनजातिपिं सचेत जुयेमाःगु खँय् व्यापक सहलह जूगु ख: ।

More Stories Like this