जनगणनाया बारे मोरङ्गय् सहलह मुँज्या

नेवाः देय् दबू मोरङ्ग जिल्ला समितिया ग्वसालय् वंगु जेष्ठ ३ गते राष्ट्रिय जनगणना २०६८ यात कया छगू सहलह मुँज्या जुल । नेवाः देय् दबू मोरङ्ग जिल्ला समितिया नायः देवेन्द्र कुमार श्रेष्ठया सभापतित्वय् जूगु उगु ज्याझ्वःलय् नेवाः देय् दबूया नायः नरेश ताम्रकारं मूपाहाँ कथं व्वति कयादीगु खः ।

ज्याझ्वःलय् राष्ट्रिय जनगणना २०६८स सकल नेवाःतय्सं थःगु मांभाय्स नेवाः भाषा च्वकेगु, थःगु जात वा जाति नेवाः जाति च्वकेगु, थःगु दोस्रो भाषा कथं थः नापं स्वापू दूगु मेमेगु आदिवासी जनजातिया भाषा च्वयेगु नापं जलखल आदिवासी जनजातिपिंत दोस्रो भाषास नेवाः भाषा च्वकेगु कुतः न्ह्याकेमाःगु खँय् व्यापक सहलह जुल ।

नापं मोरङ्ग जिल्लाया नेवाः अगुवा कार्यकर्तापिनिगु भेला यासें अमित सचेत यायेगु ज्या जूगु खः । ज्याझ्वःलय् नेवाः देय् दबूया केन्द्रीय दुजःपिं पुर्ण कृष्ण श्रेष्ठ व प्रकाश खड्गीया नं व्वति दूगु खः ।

अथेहे मुँज्याय् नेपाल आदिवासी जनजाति महासंघ, मोरङ्ग समितिया न्वकू वेदेन्द्र श्रेष्ठं नं थुगु दँया राष्ट्रिय जनगणना २०६८ स नेवाःत लिसें सकल आदिवासी जनजातिपिं सचेत जुया च्वनेमाःगु खँ न्ह्यथनादिल ।

More Stories Like this