पूर्व पञ्चतय्गु घुर्की

इलय् ब्यलय् विवादास्पष्ट व्यक्तित नापलानाः न्ह्यावलें चर्चाय् वनाच्वनीम्ह पुलांम्ह जुजु ज्ञानेन्द्र व उयागुहे खर्चं चलय् जुयाच्वंगु कमल थापाया राप्रपा नेपाल, हानं छक्वः चर्चाय् वयेत स्वःगु दु । पशुपतिइ होमयानाः तप्यंकहे जुजुया वकालत यानाः धार्मिक वसः पुनाः नं राजनीति यायेगु लाइसेन्स कयातःम्ह पाइलट बाबां नेपालय् हानं जुजु लिहां वइगु खँ ल्हानाः जुजुवादी व पञ्चतय्त तःधंगु आशा व भल्सा वियाच्वंम्ह दुम्ह बाबायाहे खँया लिधँसाय् राप्रपा नेपालं नेपाःयात हिन्दु राष्ट्र व राजतन्त्रयात सतकंहे घोषणा यायेगु धारणां संविधान दयेके मफयाच्वंगु व दयेकेगु म्याद नं गुन्हु जक ल्यं दनिवलय् जुजुवादीतय्सं हिन्दु राज्य व राजतन्त्र सतकंहे घोषणा यायेगु धयाः नेपाली जनतायात तप्यंकहे हाथ्यावीगु ज्या जूगु । संविधान दयेकेत आः जम्मा गुन्हु जक न्हि ल्यं दनि । तर थुगु गुन्हुया दुने संविधान दयेके मफैगु ई यात ध्यानय् तयाः म्याद थपय् यायेगु खँयात कयाः नेपाली कांग्रेस व मधेसवादी दलतय्सं गुगु किचलो पिकयाच्वन, उकिं समस्याया समाधान मखु, थप समस्या जक पिकाइ । समस्याया समाधान मखु । थ्वहे खँयात मलजल व्युव्युं एमालेयाहे माधव नेपाल-केपी ओली पिसं नं छ्वःगु मिइ घ्यः लुइगु ज्या यानाः खलनायकया भूमिका म्हिताच्वंगु दु ।

ततःधंगु स्वंगू दलया दथ्वी विद्यमान समस्या व असहयोगया हे लिधँसा कयाः जुजुवादी पिसं थौंया संक्रमण कालयात थःगु पक्षय् छ्यलेत स्वयेगु झ्वलय् हिन्दु धर्म व राजतन्त्रयात सतकंहे घोषणा यायेगु ख्याच्वलं ततःधंगु राजनीतिक पार्टीत ला ग्याःगु नं मदु, ग्याइनं मखु । तर जुजुवादीत आः देशय् वःगु राजनीतिक परिवर्तनयात अस्वीकार यानाः राजनीतिक मुठभेद पाखे कुहां वइगु संकेट खनेदया वःगु दु । थुकिया नितिं देशय् दुगु पञ्चतय्गु थीथी राजनीतिक दलया नाप नापं प्रतिकृयावादी व प्रतिगमनकारीतय्सं ततःधंगु संसदीय पार्टीतय्त नं लोभय् तक्यंकाः देशय् द्वन्द्व ब्वनीगु निश्चित खनेदु ।

छख्य भारतयाहे जनता पार्टींया ग्वाहालिं नेपालय् हिन्दु राज्यया घोषणा, तराइलय् हिन्दु भाषाया अभियान, राजतन्त्रया प्रति समर्थन व अन्तय् सतकं याइगु घोषणां संघीयता विरोधीत आः राहतरुपं न्ह्याः वइगु व उखे सेना समायोजनया खँ ल्हानाः संविधानसभायात विघटन यायेत स्वयाच्वंगु नेपाली कांग्रेसं आः हानं जुजुवादीत नाप मिलय् जुयाः मेगु ताण्डप नृत्य क्यन धाःसां नं अजू चायेफूगु छुं हे मदु । तर आःया मुठभेडं पूर्व पञ्चत व जुजुवादी त अन्तरिम संविधानया विरोधी जुयाः सीमाना जायेकीइ वारे मवीगु जक मखुला ? थौंहे विचाः यायेगु बांलाइ । वंगु ३१ गते नेपाल वन्दयात नेपाली जनतां अस्वीकार याःगु खँयात इमिसं लोमंके मज्यू ।

More Stories Like this