११ गतेया नितिं नेवाःतय्गु ब्यापक तयारी प्यंगू थासं जुलुस पिकाइगु
येँ (झीगु स्वनिगः)
संघीय गणतान्त्रिक नेपाःया आदिवासी जनजाति मैत्री संविधान सविधान सभां हे जारी यायेमाःगु, आदिवासी जनजातितय्गु हक अधिकार सुनिश्चित जुइमाःगु माग यानाः आदिवासी जनजाति संयुक्त संघर्ष समितिं जेठ ११ निसें १४ तक न्ह्याकीगु दवाव आन्दोलनयात ताःलाकेगु नितिं घोषणा याःगु संघर्षया ज्याझ्वः ताः लाकेत म्हिगः बुधवाः च्वंगु नेवाः स्वायत्त राज्य मंका संघर्ष समितिया मुँज्यां थी थी निर्णय याःगु दु । जेठ ११ गते बानेश्वरय् जुइगु बृहत जनप्रदर्शनय् ब्वति कायेत येँय् धरहरा सुन्धाराय्, यलय् मङ्गल बजारय् व ख्वप व पिनेयापिं नेवाःत त्रिपुरेश्वरय् मुनाः दक्व थापाथलिइ नापालानाः तःजिगु र्याली नापं बानेश्वरय् वनेगु जुइ धाःगु दु, र्यालीइ ब्वति कायेबले बाजागाजा लिसें जातीय पहिचान दइ कथं ब्वति कायेत सकल नेवाःतय्त संघर्ष समितिं इनाप याःगु दु ।
प्रचार प्रसारयात व्यवस्थित व प्रभावकारी यायेगु निसें वइगु जेठ ६ गते नेवाःतय्गु बृहत मुज्या सुथसिया ७:३० ता इलय् क्षेत्रपाति पार्टी प्यालेसय् जुइत्यंगु दु । उगु ज्याझ्वः ताःलाकेगु नितिं थुगुसि दक्व धैथें हे नेवाः बस्ती नेवाः खलः पुचःया प्रतिनिधि नापं नेवाः न्ह्यलुवाःतय्गु व्यापक सहभागिता याकेगु नितिं येँय् जेठ ७ गते थक्वाः, किसीपिढी, फर्पिङ्ग, जेठ ८ गते, टोखा, चूनीख्यलय् जेठ ९ गते गोकर्ण, सक्वय् तःजिगु सहलह न्ह्याकीगु लिसें सहरी लागाया नेवाः बस्तीइ प्रचार र्यालीत जुइगु जूगु दु । तयारीया नितिं यलय्, ख्वपय्, थिमिइ, भोतय्, टिस्टुङ्ग पालुङ्गय् नं नेवाः बस्तीइ सहलह मुज्या, प्रचार र्याली व कोणसभात जुइत्यंगु दु ।
थ्व हे झ्वलय् ११ गतेया उगु शक्ति प्रदर्शन नापं संविधानसभाया घेराउ ज्याझ्वः ताः लाकेगु नितिं आदिवासी जनजातितय्सं नं थःथःगु बाजं थानाः जुलुस पिकाइगु जूगु दु । सातदोवाटो, तिनकुने, अनामनगर, लैनचौर नापं स्वनिगःया थीथी लागां अथे जुलुस पिकयाः संविधानसभा भवन पिने न्हूबानेश्वरय् १ बजे थ्यंकाः संविधानसभा घेराउ याये धुंकाः सभा यानाः क्वचायेकेगु ज्याझ्वः दयेकूगु दु । अथे हे जेठ ९ गते मूमू राजनीतिक दलया जातीय खलः पुचः व मोर्चापाखें थःथःगु दलया केन्द्रीय ज्याकुथिइ वनाः धर्ना च्वनेगु नापं नेतातय्त ज्ञापन पौ तकं बिइगु तयारी याःगु दु । उगु हे कथं १२ गतेनिसें १४ गते तक न्हिया न्हिथं सुथय् ८ बजेनिसें बहनी ५ बजे तक निरन्तर रुपं संविधानसभापिने धर्ना च्वनीगु जूगु दु ।
