विरोधपत्र दर्ता

येँ (झीगु स्वनिगः)

संविधानसभाया म्याद थप मयायेत रािष्ट्रय प्रजातन्त्र पार्टी नेपालपाखें म्हिगः ब्यवस्थापिका संसदय् विरोधपत्र दर्ता याःगु दु । सरकारं संविधानसभाया म्याद थप यायेगु प्रस्ताव दर्ता याःगु विरुद्ध संवैधानिक राजतन्त्रवादी दल राप्रपा नेपालं अथे विरोधपत्र दर्ता याःगु खः । उगु पार्टीया संसदीय दलया नेता चन्द्रबहादुर गुरुङं अथे सूचना दर्ता याःगु खः । उगु पतिइ आः संविधानसभाया म्याद थप मयासे न्हूगु जनादेशया नितिं चुनावय् वनेमाः धकाः माग नं यानातःगु दु । उगु पार्टीया नायः कमल थापां ला छुं दिं न्ह्यः सार्वजनिक रुपं सतकं हे राजतन्त्रया घोषणा यायेगु धकाः तकं धाये धुंकूगु दु ।

संविधानया खँय् पौडेल, नेपाल व कर्ण गम्भीर मजूगु स्पष्ट
येँ (झीगु स्वनिगः)

न्हूगु संविधान जारी यायेगु घोषित दिं झिन्हु जक ल्यं दनिगु खुन्हु म्हिगः बुधवाः न्हूगु संविधानया नितिं विवाद जुयाच्वंगु विषय ज्यंकेत धकाः दयेकातःगु संविधानसभाया संवैधानिक समिति अन्तर्गतया उप समितिया मुँज्याय् एमालेया वरिष्ठ नेता माधवकुमार नेपाल, नेपाली कांग्रेसया संसदीय दलया नेता रामचन्द्र पौडेल व लक्ष्मणलाल कर्ण उपस्थिति मजूगुलिं स्थगित जूगु धैगु वय्कःपिं स्वम्हं हे संविधान निर्माणया सवालय् गम्भीर मजूगुलिं हे खः धकाः सीदुगु दु । न्हापा हे घोषणा यानातःगु कथं सिंहदरवारया राज्य व्यवस्थापन समितिया ज्याकुथिइ म्हिगःया मुँज्याय् वय्कःपिं स्वम्ह हे नेतात उपस्थिति मजूगुलिं मुँज्या अनौपचारिकताय् जक सिमित जूगु दु । नेतात नेपाल, पौडेल व कर्ण स्वम्हं हे स्वनिगलंपिने हे जुयाच्वंगुलिं अथे मुँज्याय् उपस्थिति जुइ मफुगु खः धकाः धाःगु दुसा आः हाकनं उगु उप समितिया मुँज्या थौं विहिवाः च्वनेगु धकाः धाःगु दु ।

उगु उप समितिया मुक्कं यानाः दुजः न्याम्ह दुगु खःसा न्याम्ह मध्ये स्वम्ह उपस्थिति मजूगुलिं बहुमत मदयाः अथे मुँज्या च्वने मफूगु खः । मुँज्याया नितिं उप समितिया कजि नापं एकीकृत नेकपा -माओवादी)या नायः पुष्पकमल दाहाल प्रचण्ड, सभामुख सुवासचन्द्र नेम्वाङ, संवैधानिक समितिया सभापति निलाम्बर आचार्य व उप समितिया दुजः नापं कांग्रेसया नेता विमलेन्द्र निधिया धाःसा उपस्थिति दुगु खः ।
उप समितिया म्याद वइगु जेठ १३ गते तक दु । उप समितिया मुँज्याय् अथे स्वम्ह नेतात उपस्थिति मजूगु धैगु हे गनं वय्कःपिन्सं मुँज्या हे बहिस्कार याःगु जकं मखुला धकाः मनूतय्सं न्ह्यसः तयाहःगु दु ।