'दुई तिहाई बहुमतं म्याद थप यायेगु’

येँ (झीगु स्वनिगः)

नेपाली कांग्रेस, मधेसवादी मोर्चा व राप्रपा नेपालया नेतातय्सं संविधानसभाया म्याद थप मयायेगु धकाः अडान तयाः वयाच्वंगु इलय् झलनाथ खनालया नेतृत्वय् दुगु वर्तमान सरकारया सिचाई मन्त्री रघुवीर महासेठं दलतय्गु दथुइ सहमतिं संविधानसभाया म्याद थप जुइगु वातावरण मन्त धाःसा सरकारं दुई तिहाई बहुमतं संविधान संशोधन यानाः म्याद थप यायेगु जुइ धकाः धयादीगु दु । एमालेया लोकतान्त्रिक मधेसी संगठनं म्हिगः बुधवाः ग्वसाःग्वःगु पत्रकार सम्मेलनय् न्वंवायेगु झ्वलय् मन्त्री महासेठं अथे धयादीगु खः । वय्कलं वर्तमान सरकार अन्तिम ई तक नं सर्वसम्मतपाखें हे संविधानसभाया म्याद थप याकेगु कुतः यायेगु जुइ छुं जुयाः संभव मजुल धाःसा संवैधानिक प्रक्रिया कथं दुई तिहाई बहुमतं जूसां संविधानसभाया म्याद थप यायेगु जुइ धकाः स्पष्ट यानादिल ।

संघीय लोकतान्त्रिक गणतन्त्र नेपाःया न्हूगु संविधान निर्माण मयायेकं संविधानसभा भंग यात धाःसा सरकार निरंकुश जुयाः वनी धकाः न्ह्यथसें मन्त्री महासेठं संविधानसभाया म्याद थपे यायेगुया बाहेक मेगु विकल्प मदु धकाः नं धयादिल । संविधानसभायात भंग यात धाःसा वर्तमान सरकार हे अनन्त काल तक ल्यना च्वनीगु खँ न्ह्यथसें वय्कलं संविधानसभा भंग जुल धाःसा सरकार व राष्ट्रपतियात तकं न्ह्यसः थनेगु ज्या जुइ धकाः नं धयादिल ।

संविधानसभाया म्याद थप यायकि आन्दोलन यायेगु ख्याच्वः

संयुक्त लोकतान्त्रिक मधेसी मोर्चाया नेतातय्सं आःया अवस्थाय् सहमति मजुइकं संविधानसभाया म्याद थप यात धाःसा आन्दोलन यायेगु जुइ धकाः ख्याच्वः बियादीगु दु । वय्कःपिन्सं ठोस आधार मदयेकं संविधानसभाया म्याद थप यायेमज्यू धकाः नं धयादिल । मधेसी पत्रकार समाजं म्हिगः बुधवाः वीरगञ्जय् याःगु पत्रकार सम्मेलनय् न्वंवायेगु झ्वलय् मोर्चाया नेतातय्सं अथे न्वंवानादीगु खः । इमिसं वर्तमान सरकार धैगु वामपन्थीतय्गु सरकार धकाः तकं द्वपं बियादीगु दु ।

मधेसी जनअधिकार फोरम लोकतान्त्रिकया नायः विजयकुमार गच्छेदार, तराई मधेस लोकतान्त्रिक पार्टीया नायः महन्थ ठाकुर व सदभावनाया नायः राजेन्द्र महत्तों अथे धयादीगु खः । नेता गच्छेदारं जेठ १४ गतेलिपा मुलुक गम्भीर व जटिल परिस्थितिइ वनी धकाः न्ह्यथसें आन्दोलन यायेगु ख्याच्वः बियादीगु खः । अथे हे नेता ठाकुरं वर्तमान सरकार पूर्ण रुपं हे वामपन्थीतय्गु सरकार जूगुलिं थ्व सरकारयात स्वीकार यायेफैमखु धकाः धयादिल । अथे हे मेम्ह नेता महत्तों जनमानसय् आःया अवस्थाय् अन्यौलता ब्वलंगु दु धयादिसें संविधानसभाया म्याद जबरर्जस्तीं थपेयात धाःसा आन्दोलनय् वनेगु जुइ धकाः धयादिल ।