म्याद थप मयाकेत लबिंग
म्याद थपे याःसा मधेसय् हानं आन्दोलनया ख्याच्वः
येँ (सन्ध्या टाइम्स)/संविधानसभाया म्याद थपे यायेगु धकाः सरकारं प्रस्ताव यंकेधुंकूसां उकियात विफल यायेगु लागिं नेपाली कांग्रेस व स्वंगू मधेसवादी दलत धाःसा लगे हे जुयाच्वंगु दु ।
म्याद थपे याःसां नं संविधान दयेकीगु ग्यारेन्टी मदुगु कारणं थज्याःगु संविधानसभा मदुसां छुं मपाः धइगु तर्क नेपाली कांग्रेसया नेतातय्सं तयेगु यानाच्वंगु दु।
संविधानसभाया म्याद थपे यायेगु सरकारी प्रस्तावयात विफल यायेगु लागिं कांग्रेसया नेतातय्सं थीथी दलयात नापलानाः लबिङ्ग हे शुरु यानाच्वंगु दु ।
उखे कांग्रेसं थें मधेसवादी दलतय्सं नं संविधानसभाया म्याद थपे याये दइ मखु धकाः सरकारयात ख्याच्वः बिउगु दु। उगु दलया नेतात विजय गच्छेदार, राजेन्द्र महतो व महन्थ ठाकुरपिंसं सार्वजनिक रुपं हे यदि दुई तिहाईया बल क्यनाः उगु प्रस्ताव पारित यात धाःसा हानं मधेस आन्दोलन शुरु यायेगु जुइ धकाः ख्वाच्वः बिउगु दु ।
संविधानसभाया म्याद थपे मयायेगु धाःसां वयां लिपा छु यायेगु धइगु विकल्प नं थुपिं दलतय्सं न्ह्यःने हःगु मदुनि।
नेपाली कांग्रेसं यदि संविधानसभाया म्याद थपे यायेगु खःसा प्रधानमन्त्री झलनाथ खनालं राजीनामा बीमाः धकाः शर्त न्ह्यःने तःगु दु। दछि न्ह्यः माओवादीं नं तत्कालिन प्रधानमन्त्री माधव नेपालं राजीनामा बिउसा जक म्याद थपया प्रस्तावय् मत तये धकाः राजीनामा यायेगु भ्वँतय् सही याकूगु खः। आः कांग्रेसं नं माओवादीयात वहे शर्त तःगु अनुमान यानाहःगु दु ।
म्याद थपे मयाःसा छु यायेगु? कांग्रेसयाके विकल्प मदु
नेपाली कांग्रेसं संविधानसभाया म्याद थपे याये दय मखु धकाः सरकारयात ख्याच्वः ला बियाच्वंगु दु तर म्याद थपे मयायेगु खःसा छु यायेगु धइगु विकल्प धाःसा तयार याःगु मदुनि। म्हिगः बहनी बीबीसी नेपाली सेवालिसे खँ ल्हासें नेपाली कांग्रेसया महामन्त्री कृष्ण सिटौलां धयादिल, 'म्याद थपे मयायेधुंकाः छु यायेगु धइगु बारे जिमिसं बिचाः यानागु मदुनि ।'
म्याद थपे याये दइ मखु धकाः थःपिंसं धायेगु तर म्याद थपे मजुल धाःसा छु यायेगु धकाः चाहिं छुं हे योजना धाःसा तयार मयाःगुलिं कांग्रेसया थ्व शर्तया लिउने मेगु ग्यानापुगु हे तयारी सुलाच्वंगु दयेमाः धकाः नं थन अनुमान यानाहःगु दु ।
