जनसेना प्यद्वः हे जक जूगु जूसा…

सुरेश मानन्धर

निर्माता व वितरक ल्वापुं यानाः थौंकन्हय् बलिउडय् छुं हे न्हूगु फिल्म रिलिज मजू । थ्वहे मौकाया लबः कयाः नेपालय् 'प्रचण्डया टेपं' बजाः कयाच्वंगु दु । यदि थुकिया बय्बय् थुलि हे जारी जुयाच्वनीगु खःसा 'प्रचण्डया टेप' थुगु दँया हिट फिल्म जुइत बेर मदु ।

टेपय् माओवादी अध्यक्ष प्रचण्डं बिया- च्वंगु भाषणया करिब १५ सेकेण्ड ब्वयात आपत्तिजनक तायेकूगु दु । उकी अध्यक्ष प्रचण्डं थःपिं के दुपिं ७ हजार जन-सेनायात ३० हजार दयेकागु व ३० हजारय् छानबिन याःबलय् २० हजार कायम जूगु लसताया खँ थः सैनिक-तय्त कनाच्वंगु दृश्य दु । टेप बजारय् वयेवं हल्ला जुल माओवादीं ला देशयात झंगः लाःगु जुयाच्वन । ७ हजार सेनायात ३० हजार दयेकाः जनतायात उल्लु दयेकल । माओवादीयाके दुपिं सेनाया ल्याः ७ हजार नं मखु ४ हजार जक खः अझ ४ हजार नं मखु २ हजार जक खः । मसिउ २ हजार नं मदु धाःपिं नं दु ला छु थॆं ।

अनुमान याये माओवादीयाके दुपिं जन-सेनाया ल्याः ४ हजार हे जक खः । यदि माओवादी जनसेनाया ल्याः धाथें ४ हजार हे जक खःसा नेपाःया सम्पूर्ण सरकारी सुरक्षा निकायया अधिकारीतय्सं छगू चम्चा लखय् डुबे जुयाः आत्महत्या याःसां जिल । माओवादीया थ्वहे ४ हजार सेनां नेपाःया ७० हजार जनपद प्रहरी ३० हजार सशस्त्र प्रहरी व १ लाख शाही सेनायात फनफन चाःहिकातःगु जुयाच्वन ला तत्कालिन सरकारतय्सं थुलिमछि सुरक्षाकर्मी दुथ्याःगु युनाफाइड कमाण्ड प्रयोग यानाः नं माओवादीया ४ हजार सेनायात परास्त याये मफुगु जुयाच्वन ला धाथें थुलि निकम्मा जुयाच्वन ला नेपाःया सुरक्षा संयन्त्र थ्व जाबो ४ हजार अदक्ष जनसेनायात हे परास्त याये मफुपिं नेपाली सेनाया मनोबल कुहां वइ धकाः राजनीतिक नेतात छाय् ग्याना- च्वंगु खः थुइके थाकु । माओवादीया जाबो ४ हजार सेनायात हे बुके मफुपिं नेपाली सेनाया मनोबल यदि थहां वन धाःसा थ्वं भारत व चीनया लखौं सेनायात बुके फइगु खइ ला माओवादी जनसेनाया पाय्छि ल्याः धाथें गुलि खः सुनां नं मसिउ । माओवादीं जनयुद्ध जारी जुयाच्वंगु इलय् उमिसं धाइगु ल्याः लखौं खः । गुलि लख सुनां मसिउ । युद्ध क्वचायेकाः उमिसं जनसेनाया ल्याः ३० हजार धाल । धाःगु जक मखु ३० हजार मनू हयाः क्यना नं बिउगु खः ।

माओवादीं क्यनेहःपिं मनूतय्त सेनाया दर्जा बी जिउ लाकि मजिउ धकाः छानबिन यायेगु ज्या अनमिनं याःगु खः । व ज्या अनमिन याकःचां नं याःगु मखु । फुक्कं राजनीतिक पार्टीया सहमति कयाः याःगु खः । माओवादीं ७ हजार जक मनू थने हःगुली अनमिनं २० हजार धकाः च्वया बिउगु खःसा व अनमिनया बदमाशी जुल । माओवादीं थने हःगु ला ३० हजार खः । उकी मध्यय् १० हजारयात अनमिनं फिट मजू धकाः लिकया छ्वत । अझ अबलय् छगू आरोप नं वःगु खः माओवादीं थःपिनि फुक्क जनसेनायात सार्वजनिक मयाः धकाः । विश्वया मेमेगु देशय् नं विद्रोही पुचलं फुक्कं सेनायात क्यान्टोनमेन्टय् मतइगु अनुभव दु । सम्भवतः माओवादीं नं अथे हे यात जुइमाः । थौंकन्हय् वाईसीएल धकाः ितंितं न्हुया जूपिं सकलें क्यान्टोनमेन्टय् च्वने मयःपिं जनसेना हे खः । माओवादीयाके ७० हजार ला वाईसीएल हे दु धाइ । थ्व फुक्क छथाय् तयेबलय् माओवादी-याके धाथें गुलि सेना दु धइगु खँ ला अथें हे अनुमान यायेिछं ।

अनमिनं अयोग्य धकाः लिकया छ्वःपिं जनसेना नं अनमिन थम्हं दयेकूगु क्राइटेरिया कथं जक अयोग्य जूपिं खः । उकिया अर्थ उिपं युद्ध हे मल्वाःपिं वा सेना सम्बन्धी छुं हे खँ मसिउिपं धायेगु पाय्छि मखु । तालिम व क्षमताया हिसाबं उिपं सेना हे खःसां शारीरिक हिसाबं सेना जुइत लायक मजूपिं लिकया छ्वःपिं नं यक्वं दु ।
प्रचण्डया वहे टेप स्वयेधुंकाः नेपाली कांग्रेसं आः छगू न्हूगु माग न्ह्यःने हःगु दु माओवादी जनसेनाया पुनः प्रमाणीकरण जुइमाः । थौंया अवस्था तक थ्यनेधुंकाः सेनाया पुनः प्रमाणीकरण यानाः कांग्रेसं गुलि दशक लिपा संविधान च्वयेगु बिचाः यानाच्वंगु खः व शायद गिरिजाबाबुं हे जक सिउ जुइमाः । यदि अथे मखुसा सेनाया पुनः प्रमाणी-करणपाखें देशय् गज्याःगु लिच्वः पिहां वइगु खः उकिया अनुमान नं वय्कलं यानादीगु दु ला यानामदीगु खःसा यानादिसँ । अनुमान याये धाथें सेनाया पुनः प्रमाणीकरण जुल । पुनः प्रमा-णीकरणपाखें क्यान्टोनमेन्टय् तयातःपिं जनसेनाया ल्याः २० हजारं कुहां वयाः ५ हजार जक जुल धाये । व अवस्थाय् अयोग्य धकाः ठहर याःपिं १५ हजार सेना गन वनी छु उिपं जिपिं ला अयोग्य जुल धकाः सरासर थःथःगु छेँय् लिहां वनी ला उमिसं हानं विद्रोह याइ । हानं बन्दूक ल्ह्वनी । अथवा थौंकन्हय् सशस्त्र विद्रोह यानाच्वंगु मेमेगु पुचलय् दुहां वनी । अले छु जुइ जुइ ला देशय् शान्ति
पुनः प्रमाणीकरणय् थथे मजुइ नं फु । बरु उकिया अःखः नं जुइफु । पुनः प्रमाणीकरणय् माओवादीं पिने तयातःिपं नं फुक्क हे छापामारतय्त छानबिन समितिया न्ह्यःने थना बिल धाःसा छापामारतय् ल्याः ३० हजार मखु ५० हजार नं थ्यनेफु । छुं जुयाः छापामारतय् ल्याः आः स्वयां अप्वल धाःसा छु यायेगु उकियात राजनीतिक पार्टीतय्सं स्वीकार याइ लाकि याइ मखु उकिं थ्व सवालय् अनेक न्ह्यसः पिहां वइ पाण्डोराया बाकस चायेके थें । थ्व ई न्हून्हूगु न्ह्यसः पिकायेगु मखु वयाच्वंगु न्ह्यसःयात समाधान यायां वनेगु खः । न्हापा दुगु न्ह्यसःया लिसः मालेगु त्वःताः न्हून्हूगु न्ह्यसः दयेकु दयेकुं न्ह्याः वनेगु खःसा गन वनाः क्वचाइ झीगु शान्तिया यात्रा?

More Stories Like this