नेपालं नीस्वंगु न्हापांगु अन्तर्राष्ट्रिय सिरपाः

थुगुसी बुद्ध जयन्ती कुन्हु नेपाः सरकारं याःगु छगू न्हूगु व महत्वपूर्ण ज्या खः गौतम बुद्ध अन्तर्राष्ट्रिय शान्ति सिरपाः लःल्हायेज्या। लुम्बिनीइ म्हिगः जूगु छगू विशेष समारोहय् जापानया निगू शहर हिराशिमा व नागासाकीया पुलांपिं मेयरपिंत राष्ट्रपति डा. रामवरण यादवया ल्हातं उगु सिरपाः लःल्हाःगु खः। सिरपाः लःल्हानाः कायेत सम्बद्ध व्यक्तिपिं थः हे नेपाः झाःगु कारणं सिरपाःया गरिमा स्थापित जूगु दु ।

गौतम बुद्ध अन्तर्राष्ट्रिय शान्ति सिरपाः गठनया छगू जक मखु तःगूमछि आयामिक महत्व दु। दकलय् न्हापां ला थ्व नेपालं नीस्वंगु न्हापांगु अन्तर्राष्ट्रिय सिरपाः खः। थुकिं नेपाःया म्हसीका विश्वया मेमेगु देशय् नं थ्यंकीगु खँय् शंका मदु। मेगु, थ्व शान्तिया लागिं बीगु सिरपाः खः। नेपाः थः हे नं छगू दशक तक अशान्ति व द्वन्द्वं ग्रस्त जूगु कारणं शान्तिया लागिं सिरपाः पलिस्था यायेबलय् थुकिं विश्व शान्ति जक मखु थःगु आन्तरिक शान्ति प्रति नं सकल नेपाःमिपिंत अझ प्रतिवद्ध याना बी। विश्वशान्ति प्रति नेपाः सदां प्रतिवद्ध दु धइगु खँया थ्व छगू दसु नं जुल। अथे हे मेगु खँ, थ्व गौतम बुद्धया नामय् पलिस्था जूगु संसारया हे न्हापांगु अन्तर्राष्ट्रिय सिरपाः खः। गौतम बुद्ध नेपालय् जन्म जूगु कारणं नेपालं हे बुद्धया नामं अन्तर्राष्ट्रिय सिरपाः पलिस्था याःगुलिं थ्व बुद्धप्रति नेपाः राज्यं क्यंगु दायित्व नं खः। लिसें थ्व ज्यां बुद्धया जन्मस्थलयात कयाः विश्वय् अनावश्यक हल्ला यानाच्वंगु तत्वतय्त स्यल्लाःगु लिसः बीगु ज्या नं जुइ। आर्थिक ल्याखं नेपाःयात थ्व थिकेगु सिरपाः खःसां थुकिया निरन्तरता आः जारी हे याना तयेमाः ।

More Stories Like this