सेना समायोजनबारे ठोस प्रस्ताव जेठ १४ गते न्ह्यः हे हयेत माओवादीयात इनाप

येँ (झीगु स्वनिगः)

प्रधानमन्त्री झलनाथ खनालं सेना समायोजनबारे ठोस प्रस्ताव जेठ १४ गते न्ह्यः हे हयेत माओवादीयात इनाप यानादीगु दु । मंगलवाः पार्टी ज्याकू बल्खुइ मदन - आश्रति स्मृति दिवसया लसताय् ग्वसाः ग्वःगु ज्याझ्वलय् न्वंवानादिसें खनालं थज्याःगु इनाप यानादीगु खः । खनालं देय् जटिल संक्रमणकालय् दुगुलिं थःथवय् दुगु कचवं क्वःचायेकाः राष्ट्रिय सहमति लिसे न्ह्यःने न्ह्यायेमाःगु धयादीगु खः । वय्कलं संविधान दयेकेगु नितिं संविधानसभाया विकल्प मदुगुलिइ बहः बियादिसें थःथवय् सहलह यानाः संविधानसभाया ई तनेमाःगु वय्कःया धापू खः ।

झिंच्यादँ न्ह्यः रहस्यमय ढंगं सीपिं तत्कालीन एमाले मू छ्याञ्जे मदन भण्डारी व नेता जीवराज आश्रतिया स्मृति दिवस मंगलवाः एमालें थीथी ज्याझ्वः यानाः हंगु दु । २०५० साल जेठ ३ गतेया दिं दासढंुगाय् जूगु जीप दुर्घटनाय् भण्डारी व आश्रति निम्ह सीगु खः । दुर्घटना सामान्य खः वा नियोजित खः धइगु बारे आःतक्क नं सत्य तथ्य पिने वयेफूगु मदुनि । एमालेदुने भण्डारीया आदर्श व सिद्धान्त परित्याग याःगु जानकारी बियाः आपालं कार्यकर्तात पलायन नापं जुइधुंकूगु दु । भण्डारीया जहान विद्या भण्डारी रक्षामन्त्री जूगु इलय् नं उगु घटनाया छानबिनय् मयाःगु खँय् कार्यकर्तातय्सं तं प्वंकूगु खः ।