बुद्ध भगवान् मखु बरु छम्ह दार्शनिक खः : प्रचण्ड

येँ (झीगु स्वनिगः)

एकीकृत नेकपा माओवादीया नायः पुष्पकमल दाहाल प्रचण्डं गौतम बुद्ध भगवान् स्वयाः नं उबलय्या महान् दार्शनिक जूगु बिचाः तयादीगु दु । नीन्यासः व न्यय्न्याक्वःगु बुद्ध जयन्तिया लसताय् फुक्क बुद्ध धर्मावलम्बीपिंत भिंतुना देछायादिसें प्रचण्डं उगु इलय् धर्मया नामय् न्ह्यानाः वयाच्वंगु फुक्क कथंया विकृतिया विरुद्ध ईश्वर वा परमात्माया अस्तित्वबारे मस्यूगु न्ह्यःथनादिसें परोक्ष ढंगं भौतिकवादयात तिबः ब्यूगु खँ न्ह्यःथनादीगु दु । दुःखया श्रोत मालेगु व उकियात न्हंकाः छ्वइम्ह सिद्धार्थ गौतमं मानव जातियात हे तःधंगु गुण याःगु दु - प्रचण्डपाखें पिथंगु विज्ञप्तिइ न्ह्यःथनातःगु खः । उगु इलय् नं राजस्वी सुख सुविधा त्वःताः सर्वसाधारण मनूतय्गु थेंज्याःगु हे जीवन यापन यायेगु वय्कःया त्याग जूगु प्रचण्डया दाबी खः ।

थौंकन्हय्या संक्रमणकालीन अवस्थाय् बुद्धया शिक्षाया महत्व झन् अप्वयाः वंगु नायः प्रचण्डं जानकारी बियादीगु दु । उगु हे सन्दर्भय् प्रधानमन्त्री झलनाथ खनालं सङ्क्रमणकालीन घडीइ शान्तिया औचित्य व महत्वयात आत्मसात यायेगु थौंया आवश्यकता दुगु खँय् बहः बियादीगु खः । देय् जटिल संक्रमणकालय् दुगुलिं शान्तिपूर्ण जनक्रान्तिया उपलब्धियात संस्थागत यायेत उकिया सम्बाहक शक्तितदथुइ एकता व सहकार्य यायेमाःगु नं सन्देशय् न्ह्यःथनातःगु दु । वहे झ्वलय् मंगलवाः नीन्यासः व न्यय्न्याक्वःगु बुद्ध जयन्ति, नेपाल लगायत विश्वन्यंक थीथी ज्याझ्वः यानाः हंगु दु । उगु हे झ्वलय् बुद्ध जन्मस्थल लुम्बिनीइ झः झः धायेक ज्याझ्वः नापं याःगु दु । विशेष समारोहसं न्हापांगु खुसिइ गौतम बुद्ध अन्तर्राष्ट्रिय शान्ति सिरपाःपाखें निम्ह जापानी नागरिकतय्त नं हंगु खः ।

न्यय्द्वः अमेरिकी डलर अर्थात थ्यंमथ्यं स्वीखुगू लख तका राशीया शान्ति सिरपाःपाखें जापानया हिरोशिमाया पुलांम्ह मेयर तादातोसी आकिबा लिसे नागासाकीया मेयर तोकिहिसा ताउएयात राष्ट्रपति यादवं लःल्हाःगु खः । वय्कःपिंसं विश्व शान्तिया नितिं विशेष योगदान याःगु दाबी लिसे सिरपाः लःल्हाःगु खः । आवंनिसें प्रत्येक दँ थ्व सिरपाः लःल्हायेगु नं सरकारं निर्णय नापं याःगु दु । समारोहसं न्वंवानादिसें राष्ट्रपति डा. रामबरण यादव, उपराष्ट्रपति परमानन्द झा, रक्षामन्त्री विष्णु पौडेल, संस्कृति मन्त्री खगेन्द्र प्रसाईं लगायतं शान्तिया मार्गपाखें न्ह्यःने न्ह्यायेमाःगु थौंकन्हय्या मागः जूगु धयादीगु दु । बुद्ध जयन्तिया लसताय् ग्वसाः ग्वःगु समारोहसं ब्वति कायेत व लुम्बिनी भ्रमणया नितिं स्वदेश लिसे विदेशपाखें द्वलंद्वः बौद्ध धर्मावलम्बी व पर्यटकत लुम्बिनी थ्यंकादीगु खः । बुद्ध जयन्तिया लसताय् मंगलवाः येँया स्वयम्भु, बौद्ध लगायतया थासय् नं ज्याझ्वः न्ह्याःगु खः ।