पूँजी बजाः सुधारया दिशाय्

येँ (झीगु स्वनिगः)

नेपाल स्टक एक्सचेन्जय् सोमबाः जूगु कारोबारय् नेप्से एक दशमलव चार अङ्क थहांवनाः ३५०.६३ अङ्कय् बन्द जूगु दु । न्हापा छक्वःपतिकं कुहांवयाच्वंगु जूसां नेप्से ३५० अङ्क स्वयाः क्वय् कुहांवःगु जूसां नं नेप्सेय् वंगु छुं दिंनिसें छुं भचा सुधार खनेदुगुलिं लगानीकर्ताया आकर्षण अप्वःगु दु । बजारय् थौंकन्हय् दुगु गुलिखय् कम्पनीया शेयर मू किताबी मू स्वयाः नं म्हो जूगु दु । बांलाःगु प्रतिफल बिइफुगु कम्पनीया शेयरत नं तसकं म्हो मूल्यं दइगु अवस्थां लगानीकर्ता शेयर खरिद यायेत आकषिर्त जूगु धाःगु दु । देशय् राजनीतिक अस्थिरता कायम हे जूसां नं सुधारया आशा धाःसा सीगु मदुनि । केन्द्रीय निक्षेप प्रणाली लागू जुइगु व आःयात न्यागू न्हूगु दलाल कम्पनीत तनेगु नितिं नं धितोपत्र बोर्डया स्वीकृति प्रदान यायेधुंकूगुलिं नं बजारय् लगानीकर्ताय् अप्वः उत्साह ब्वलंगु दु । नेपाली शेयर बजाः तसकं न्यून बिन्दुइ थ्यंगु खँ सरकारं नं स्वीकार यानाः उकियात थकायेगु नितिं म्युचअल फण्ड सकि्रय याकेगु, कर्मचारी सञ्चयकोष, नागरिक लगानीकोष व राष्ट्रिय बीमा संस्थान थेंज्याःगु संस्थाया संस्थागत लगानी शेयर बजारय् दुकायेगु लकस दयेकेगु थेंज्याःगु खँ हयेगुलिइ अर्थमन्त्रालयं लँपू चायेकूगु दु ।

बजाःयात सुधार यायेगु नितिं धितोपत्र दलाल व्यवसायी संघं झिगू बुँदे सुझाव न्ह्यब्वःगु दुसा गैरआवासीय नेपालीया लगानी शेयर बजारय् याकेगु विषयया कार्यान्वयन जुइगु कथंया नीति लिसे वइगु बजेटपाखें पूँजीगत लाभकरय् कमी हयेगु खँय् नं अर्थमन्त्रालय सकारात्मक खनेदुगुलिं नं बजारय् छुं माग अप्वइगु अपेक्षा याःगु दु । सोमबाःया कारोबारय् जम्माजम्मी च्यय्गू कम्पनीया एक हजार ३६६ कारोबारपाखें ६३ हजार ९४५ कित्ता शेयरया कारोबार जुयाः कूल एक करोड २८ लख ४८ हजार ९६४ तका बराबरया शेयर खरिद बिक्री जूगु दु । नेप्सेय् सोमबाः जूगु कारोबारय् प्रमुख गुमय् याःपिं कम्पनीइ युनिलिभर ११० तका, लक्ष्मी बैङ्क ४२ तका दुगु खःसा कमय् याःगु कम्पनीइ विशाल बजार कम्पनी ५७ तका, नागरिक लगानी कोष २५ तका, नबिल बैङ्क ३८ तका दुगु खः ।

More Stories Like this