अन्ततः कमल थापां जुजुवादीतय्गु आगं प्वल
येँ (झीगु स्वनिगः)
संघीय गणतान्त्रिक नेपाःया अन्तरिम संविधानया भावनाया अःखः राजतन्त्र व हिन्दु राष्ट्रया नितिं धकाः न्ह्याः वनाच्वंगु दल राष्ट्रिय प्रजातन्त्र पार्टीया नायः कमल थापां अन्ततः जुजुवादीतय्सं थ्व इलय् छु यायेगु योजना दयेकाच्वंगु दु धैगु आगं प्वलादीगु दु । वय्कलं म्हिगः मंगलवाः संचारकर्मीतलिसे खँ ल्हायेगु झ्वलय् आः सतकं हे राजतन्त्र व हिन्दु राष्ट्र धकाः घोषणा यायेगु जुइ धयादीगुयात मनूतय्सं धात्थें जुजुवादी व पुलांम्ह जुजु ज्ञानेन्द्रया भावना हे उलादिल धकाः टिप्पणी यानहःगु दु ।
सुनसरीया सदरमुकामय् संचारकर्मीतलिसे खँ ल्हायेगु झ्वलय् आःया अवस्थाय् देशय् राजतन्त्र अनिवार्य जुयावल धकाः दावी यानाः अथे न्वंवानादीगु खः । तत्काल हे राजसंस्था व हिन्दु राष्ट्रया बारे पुर्नविचार मयात धाःसा सतकं हे राजतन्त्र नापं हिन्दु राष्ट्र घोषणा यायेगु धकाः खुल्लेआम अन्तिरिम संविधानया भावनाया अःखः न्वंवानादीगु खः । जनयुद्ध व जनआन्दोनया बलं वःगु गणतन्त्र, धर्म निरपेक्षता व संघीयताया विरुद्ध अथे तप्यंक हे न्वंवानादीगु धैगु वर्तमान तरल राजनीतिक अवस्थाय् लवः कायेगु नापं छगू कथं देय्यात लिखतं यंकेगु अर्थात प्रतिगमनपाखे यंकेगु कुतः जुयाच्वंगुया संकेत खः धकाः मनूतय्सं टिप्पणी यानहःगु दु ।
