माले समाजवादीपाखें निम्ह सभासद्यात निलम्वन

मन्त्री व राज्यमन्त्रीया नां सिफारिस

येँ (झीगु स्वनिगः)

प्यम्ह सभासद्त नापं नेकपा -माले) पाखें कुचा दलाः दयेकूगु नेकपा माले -समाजवादी)पाखें थःगु पार्टीया निम्ह सभासदतय्त इमिसं कयाः वयाच्वंगु जिम्मेवारीं च्यूत यानाः निलम्वन याःगु दु । पार्टीया केन्द्रीय कमिटीया नकतिनि जक क्वचाःगु स्वक्वःगु पूर्ण मुँज्यां संसदीय दलया नेता नापं पार्टीया सचिव यदुवंश झायात सचिव नापं केन्द्रीय सदस्यपाखें व संसदीय दलया सचेतन तिकलबहादुर थापामगरयात नं केन्द्रीय कमिटीपाखें फुक्क जिम्मेवारीं निलम्बन याःगु दु । उगु पार्टीपाखें म्हिगः मंगलवाः याःगु पत्रकार सम्मेलनय् सभासद् झायात पार्टीया नीति अःखः ज्या याःगु, पार्टीया ध्यबा हिनामिना याःगु, संसद विकास कोषया ध्यबा दुरुपयोग याःगु द्वपं ब्यूगु दु । अथे हे सभासद मगरयात पार्टीयात ध्यबा हिनामिना याःगु, संसदया लेभी दुरुपयोग याःगु व कुटनीतिक पासपोर्ट दुरुपयोग याःगु द्वपं ब्यूगु दु ।

इमिगु ज्यायात कयाः छानविन यायेगु नितिं मुँज्यां पार्टीया मूछ्याञ्जे विष्णुराज अर्यालया संयोजकत्वय् स्वम्हेसिया छगू पुचः नं दयेकूगु दु । अथे हे पार्टीया सभासद् शारदा नेपालीं नेपालगन्जय् थ्वँ कायेका होहल्ला याःगु विषययात कयाः नं छानविन यायेत कमिटी दयेकूगु दु । पार्टी तछ्यायेगु षडयन्त्र याःगु द्वपनय् केन्द्रीय दुजःत सोमबहादुर तामाङ, देबेन्द्र घतानी, राम सोगारत पासवान, रोशन राणा, पासाङ तामाङ, गोपाल देबकोटा, सरोज कार्की, विष्णुप्रसाद चौधरी व मंगलप्रसाद चौधरी नापं गुम्हेसित पार्टीया साधारण सदस्य हे मजुइगु कथं निस्काशन याःगु तकं उगु पार्टीं न्ह्यथंगु दु ।

अथे हे हरिप्रसाद न्यौपाने, सुवासराज काफ्ले, प्रज्वल अर्याल, नारायण खरेल,ऋषिराम आचायृ, अर्जुन न्यौपाने, एस आचार्य, मिनबहादुर सुनार, जीएन शर्मा, डम्बर विक्रम कार्की, राजु विष्ट, खड्क बहादुर विष्ट, शंकर भण्डारी, विरेन्द्र बहादुर बोगटी व मनोजबहादरयात केन्द्रीय कमिटीइ मनोनित नं याःगु दु । उगु पार्टीं प्रधानमन्त्री झलनाथ खनालया नेतृत्वया सरकारय् पार्टीया नाom जगतबहादुर बोगटीयात मन्त्री व विद्युत बज्राचार्ययात राज्यमन्त्रीइ छ्वयेत प्रधानमन्त्रीयात सिफारिस यानाः पौ छ्वयागु दु धकाः नं धाःगु दु । माले समाजवादी पार्टीं संविधानसभापाखें हे संविधान जारी यायेमाःगु निष्कर्ष पिकयाः उकिया नितिं जनतायात विश्वास जुइगु कथंया शान्ति व संविधानया खाका न्ह्यब्वयेमाः धकाः माग नं याःगु दु ।