स्वंगू दलपाखें मंकाः प्रस्तावया तयारी

येँ (झीगु स्वनिगः)

झलनाथ खनालया नेतृत्वय् दुगु वर्तमान मंकाः सरकारय् दुथ्याःगु मूमू स्वंगू राजनीतिक दल एकीकृत नेकपा -माओवादी), नेकपा -एमाले) व मधेसी जनअधिकार फोरम नेपालया शीर्ष नेतातय् दथुइ शान्ति प्रक्रियायात पूवंकेगु नितिं सरकारपाखें मंकाः प्रस्ताव यंकेगु धकाः सहमति जूगु दु । प्रधानमन्त्री निवास वालुवाटारय् म्हिगः मंगलवाः स्वंगू दलया शीर्ष नेतातय्गु दथुइ जूगु गम्भीर कथंया उगु मुँज्याय् अथे सहमति जूगु खः । उगु मुँज्याय् प्रधानमन्त्री नापं नेकपा -एमाले)या नायः झलनाथ खनाल, एकीकृत नेकपा -माओवादी)या नायः पुष्पकमल दाहाल प्रचण्ड व उप प्रधानमन्त्री नापं मधेसी जनअधिकर फोरम नेपालया नायः नापं उप प्रधानमन्त्री उपेन्द्र यादवया दथुइ अथे सहमति जूगु खः ।

संविधानसभाया म्याद वइगु जेठ १४ गते तक जक ल्यं दनिगु जुयाः वसिबें न्ह्यः हे स्वंगू दलपाखें शान्ति प्रक्रियाया सवालय् मंकाः प्रस्ताव हइ धकाः धाःगु दु । प्रधानमन्त्रीया प्रेस सल्लाहकार सूर्य थापां संचारकर्मीतलिसे खँ ल्हासें स्वगू दलया शीर्ष नेतातय्गु दथुइ शान्ति प्रक्रिया पूवंकेगु नितिं मंकाः प्रस्ताव यंकेगु सवालय् सहमति जूगु दु धकाः जानकारी बियादीगु दु । वय्कलं अथे मंकाः प्रस्तावया बारे एकीकृत माओवादी दुने सहलह जुइ धुंकाः जक छगू मोडल तयार जुइगु नापं अनं लिपा नेपाली कांग्रेस नापं मेमेगु दलतलिसे नं सहलह ब्याकाः सहमतिया नितिं कुतः यायेगु खँ जूगु दु धकाः जानकारी बियादीगु दु ।

अथे हे आःया अवस्थाय् मंकाः कथं शान्ति प्रक्रियाया प्रस्तावयात प्रधानमन्त्री झलनाथ खनालं सेना समायोजन विशेष समितिइ प्रस्तावया रुपय् यंकी धकाः नं धाःगु दु । अथे हे न्हूगु संविधान निर्माणया झ्वलय् ब्वलनाच्वंगु पंगःयात सहमतिया माध्यमं ज्यंकेगु नितिं संविधानसभाया संवैधानिक समिति अन्तर्गत गठन जूगु उप समितियात क्रियाशिल यायेगु धकाः नं स्वम्ह नेतातय् दथुइ सहमति जूगु खः । लिपांगु इलय् वयाः उप समितिया म्याद वइगु जेठ १३ गते तकया नितिं संवैधानिक समितिपाखें थप याःगु खःसा उगु उपसमितिया कजि माओवादीया नायः प्रचण्ड जुयाः ज्या यानाच्वनादीगु दु ।