अझ नं रहस्यमय जुयाच्वंगु दासढुंगा दुर्घटना
थौं हानं छक्वः २०५०साल जेठ ३ गतेयात लुमंकेगु ज्या जुल । हान छक्वः तत्कालीन नेकपा (एमाले)या महसचिव मदनकुमार भण्डारी व संगठन विभाग प्रमुख जीवराज आश्रितयात लुमंकल, अले लुमंकल दासढुंगा दुर्घटनायात ।
थौंया न्हिसं वंगु झिंच्यादँ न्ह्यः भण्डारी व आश्रित छगू रहस्यमय दुर्घटनाय् सीगु खः । २०५० साल जेठ ३गते पोखराय् जूगु पार्टीया आन्तरिक ज्याझ्वलय् ब्वति कयाः चितवनय् लिहांवयाच्वंगु इलय् दासढुंगाय् जीप दुर्घटनाय् जुयाः निम्ह नेतात मदुगु खः ।
झिच्यादँ न्ह्यः निसें एमाले न्ह्याकाच्वंगु पुलांगु हे परम्परां थौं नं निरन्तरता काल, वय्कःपिनि नांमय् स्मृति दिवस हनाः । अले हानं पुलांगु हे सः थ्वल - घटना रहस्यमय खः, थुकिया बारे अझ नं उच्चस्तरीय छानबिन जुइमाः । तर छानबिन सुनां याइगु? सः थ्वयेकीपिं फुक्कं मौन ।
घटना लिपा निगू सरकारी, छगू एमाले व छगू नागरिक समाजपाखें यानाः प्यंगू बिस्कं बिस्कं छानबिन आयोग नीस्वंगु खः । सरकारया पाखें पुलाम्ह अतिरित्त न्यायाधीश प्रचण्डराज अनिल व सर्वोच्च अदालतया न्यायाशी त्रिलोकप्रताप राणया अध्यक्षताय् आयोग नीस्वंगु खः । अथेहे एमालें केपी शर्मा ओली व नागरिक समाजापाखे पद्मरत्न तुलाधरया अध्यक्षताय् आयोग नीस्वंगु खः ।
निगू सरकारी आयोगं घटना सामान्य सतक दुर्घटना जक जूगु खँ न्ह्यथंगु खःसा मेगू निगू आयोगं षड्यन्त्रपूर्ण तरिकां हत्या याःगु निष्कर्ष पिकाःगु खः । तर सुनां उगु षड्यन्त्र याःगु धाःसा प्रतिवेदनय् न्ह्यथनातःगु मदु । अथें हे रहस्यमय घटनायात प्यंगू आयोगं प्यखे स्वःगु प्रतिवेदन न्ह्यब्वयेवं थुकियात अझ रहस्यमय दयेकाबिउगु खः ।
अझ रहस्यमय ला उबले जुल गुबले थुगु घटनाया छम्ह जक साक्षी उगु दुर्घटना जूगु जीपया चालक अमर लामाया हत्या जुल । न्यादँ तकया जेल जीवन लिपा 'मदन भण्डारीया हत्यारा छ हे मखुला' धासें येँय् लामाया हत्या जूगु खः । थुकिं अझ रहस्यमय दयेकूगुलिं एमालें घटनाया छानबिन अझ नं जुइमा:गु माग यानाच्वंगु ख: ।
तर विडम्बना, अबलय् दासढुंगा घटनाय् तत्कालीन प्रधानमन्त्री गिरिजाप्रसाद कोइराला, भारत लगायत विदेशी शक्तितय् ल्हाः दुगु दावी या:पिं एमाले नेतात थौं सरकार थ्यनेधुंकूसां थुकी उलि च्यूताः तयेगु ज्या जूगु मदु । तर स्मृति दिवस कुन्हु छन्हु घटनाया बारे छानबिन जुइमाःगु व घटना रहस्यमय षड्यन्त्र खः धायेगु धाःसा ल्वममंक धायेगु याः । अझ घटनाया हत्यारा झीसं सिउ धकाः दावी याःपिं एमाले नेतात माधवकुमार नेपाल स्वयम प्रधानमन्त्री व केपी शर्मा ओली गृहमन्त्री जुइधुंकल, तर घटना बारे छानबिन यायेगु कुतः मजू ।
थ्व दक्वं घटनाक्रम स्वयेगु खःसा घटना आः सदांया निंतिं रहस्यमय हे जुइगु खनेदु । यदि अथेहे खःसा दच्छि छक्वः जेठ ३या न्हि कुन्हु मदन भण्डारी व जीवराज आश्रितयात छानबिन यायेमाः धकाः हालाः श्रद्धाञ्जली जक बीगुया छुं अर्थ मदु । वय्कःपिं प्रति सच्चा श्रद्धाञ्जली धइगु उगु घटनायात अझ रहस्यमय मदयेकूसें उच्चस्तरीय छानबिन यानाः सत्य तथ्य जनता समक्ष न्ह्यब्वयेगु बाहेक मगू जुइमखु ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
