पिने हे दयेकाच्वंगु दु संविधान

अर्बौं तूगु संविधानसभा पिने क्यनेगु ब्वसा जक

येँ (सन्ध्या टाइम्स)/संविधान दयेकेगु लागिं राज्यं अर्बौं दां खर्च यानाः निर्वाचन मार्फत संविधानसभा गठन यानातःगु दुसां संविधान च्वयेगु ज्या धाःसा संविधानसभां पिने मेगु हे थासय् जुयाच्वंगु खँ छगू विशिष्ट सूत्रपाखें सीदुगु दु।
संविधानसभां संविधान च्वये मफुत धकाः सर्वसाधारण जनतां चिन्ता प्वंकाच्वंसां नेतात धाःसा ढुक्क जुयाच्वंगु छता मू कारण थ्व हे खः धकाः नं सूत्रं धाःगु दु ।

संविधानसभा पिने जक ब्वयाः संविधान च्वयेगु ज्या धाःसा मेगु हे छगू पुचः दयेकाः यानाच्वंगु सूत्रया दावी दु। संविधान च्वयेगु थ्व ज्या गोप्य रुपं यानाच्वंगु खः। थुकिया बारे छुं विशिष्ट मनूतय्त जक जानकारी बियाः मेपिंत धाःसा सुयातं छुं मकँसे तयातःगु नं सूत्रया दावी दु।
गोप्य रुपं अलग्ग हे च्वनाः संविधान च्वयेगु ज्या यानाच्वंगु उगु पुचलय् सु सु दुथ्याः धइगु खँ धाःसा अझ नं सी मदुनि। उकी संविधानसभाय् दुमथ्याःपिं 'विशेषज्ञ'त दुगु खँ सूत्रं धाःगु दु। उगु पुचलं विदेशय् संविधान दयेकेगु ज्या यानाः आपालं अनुभव मुंकेधुंकूपिं मनूत समेत सःताः राय कायेगु ज्या यानाच्वंगु नं सूत्रं धाःगु दु। उगु पुचलं खास यानाः दक्षिण अफ्रिका, श्रीलंका आदि थेंज्याःगु छगू इलय् आन्तरिक द्वन्द्वं ग्रस्त जुयाच्वंगु देशय् संविधान च्वयेगु ज्या यायेधुंकूपिं मनूतय्के बिचाः कायेगु ज्या यानाच्वंगु दु ।

उगु पुचलं संविधान तयार याये धुनेवं हे थुकियात संविधानसभा मार्फत जारी याइगु खँ नं सूत्रं धाःगु दु।
संविधानसभां पिने मेगु हे थासय् संविधान च्वयेगु ज्या जुयाच्वंगु बारे संविधानसभाया छुं छुं सभासद्तय्सं नं सीकेधुंकूगु दुसां उमिसं थ्व वास्तवय् गन सुनां यानाच्वन धइगु खँ धाःसा सीके मफुनि ।

आः वइगु जेठ १४ गते संविधानया मस्यौदा जारी यायेगु धकाः पिने धयातःसां उगु मस्यौदा वास्तवय् संविधानसभाया सभासद्तय्सं तयार यानातःगु मस्यौदा जक खः। तर उकियात गय् यानाः जारी यायेगु धइगु खँय् नं विवाद जुयाच्वंगु दु। सूत्रं बिउगु जानकारी कथं माओवादी अध्यक्ष प्रचण्डं आः जारी यायेगु मस्यौदा संविधानय् छु छु बुँदा तयार जुल धकाः छगू धलः दयेकाः क्यनेगु प्रस्ताव तःगु दु। उकी थ्व थ्व बुँदाय् सर्वसम्मति जूगु दु, थ्व थ्व बुँदाय् दुई तिहाईया समर्थन दु, थ्व थ्व बुँदाय् बहुमतया समर्थन दु, थ्व थ्व बुँदाय् बहुमत मदु धकाः पूर्ण रुपं हे विवरण पेश यायेगु प्रस्ताव तयादीगु खँ सूत्रं धाःगु दु। तर गुलिस्यां धाःसा विवाद जूगु बुँदा त्वःताः संक्षिप्त संविधान जक जारी यायेमाः धकाः नं प्रस्ताव तयाच्वंगु खँ नं सीदुगु दु ।