दुई तिहाईया अभ्यास मयाःसा बांलाः

संविधानसभाया म्याद दछि थपे यायेगु लागिं सरकारं दर्ता याःगु प्रस्ताव सर्वसम्मति जुयाः पारित जुइगु सम्भावना म्हो जुया वंगु दु। अथे खःसां अन्तिम इलय् वयाः थ्व प्रस्ताव सर्वसम्मतं हे पारित जुइगु आशा धाःसा आः नं अन्त्य जूगु मदुनि। देय्या राजनीतिइ हरेक महत्वपूर्ण घटना अन्तिम इलय् हे वयाः जुइगु चलन दुगु कारणं थ्व नं अथे हे जुइगु खँय् सम्भवतः शंका मयाःसां जीफु ।

संविधानसभाया म्याद थपे यायेत संविधान संशोधन यायेगु थ्व प्रस्ताव यदि सर्वसम्मतं पारित मजुल धाःसा उकियात दुई तिहाई बहुमतं जूसां पारित याकेत स्वइगु स्वाभाविक खः। प्रस्तावया पक्षय् कमसेकम दुई तिहाई जकसां खाका तयेगु लागिं प्रधानमन्त्री झलनाथ खनाल सक्रिय जुइधुंकूगु दु। तर थ्व प्रस्तावयात दुई तिहाई बहुमतं पारित याकेगु ज्या धाःसा मयाःसा बांलाइ। यदि थ्व छगू प्रस्ताव दुई तिहाई बहुमतं पारित जुल धाःसा वयां लिपा हरेक प्रस्ताव दुई तिहाईनं पारित याना यंकेगु चलन शुरु जुइ। राष्ट्रिय सहमति धकाः हालाच्वंपिनि लागिं थ्व बांलाःगु अभ्यास जुइ मखु। थौं संविधान संशोधनया लागिं शुरु याःगु थ्व अभ्यास कन्हय् न्हूगु संविधान च्वयेगु ज्याय् तकं लागू जू वनी। खतुं संविधान च्वयेगु ज्याय् सहमति कायम हे मजुल धाःसा दुई तिहाईनं हे पारित यायेगु व्यवस्था ला मदुगु मखु, अथे खःसां मेगु विकल्प दत्तले विभाजनया स्पष्ट किपा हे किया बीगु थज्याःगु अभ्यास धाःसा मयाःसा बेश जुइ। थुकिया लागिं सत्तापक्ष जक तयार जुयां मगाः विपक्षी नं तयार जुइमाः। यदि विपक्षीं उकी ग्वाहालि मयात धाःसा राजनीति वहे बांमलाःगु विकल्पय् फहिउ वनी ।

More Stories Like this