दुई तिहाई खाकेगु प्रमया कुतः
प्रस्ताव विफल यायेगु कांग्रेसया तयारी
येँ (सन्ध्या टाइम्स)/जेष्ठ १४ गते फुइगु संविधानसभाया म्याद हाकनं दछि थपे यायेगु प्रस्ताव संविधानसभाया दुई तिहाई बहुमतं पारित याकेगु नितिं प्रधानमन्त्री झलनाथ खनाल तसकं सक्रिय जुयादीगु दु ।
दुई तिहाई बहुमत खाकाः संविधान संशोधनया प्रस्ताव पारित याकेगु कुतःया झ्वलय् प्रधानमन्त्री खनालं थौं राष्ट्रिय जनमोर्चाया अध्यक्ष चित्रबहादुर केसीलिसे सहलह ब्याकादीगु दु। प्रम निवास बालुवाटारय् थौं सुथय् केसीलिसे शान्ति प्रक्रिया, संविधान व संविधानसभाया म्याद बारे सहलह ब्याकादीगु खँ प्रमया प्रेस सल्लाहकार सूर्य थापां कनादीगु दु। संविधानसभाया म्याद थप यायेगु नितिं संसदय् दर्ता जूगु संविधान संशोधनया प्रस्ताव पारित यायेगु नितिं नेपाली कांग्रेस, मधेसवादी दल व मेमेगु दलया नेतातलिसे नं सहलह ब्याकेगुली ब्यस्त जुयादीगु दु। वय्कलं थौं हे चिचीधंगु दलया नेतातलिसे नं सहलह ब्याकादी। थौं हे प्रम खनालं चिचीधंगु १७ दल नापं नेकपा एकीकृतलिसे नं सहलह ब्याकादीगु ज्याझ्वः तयातःगु दु ।
उखे प्रमुख प्रतिपक्ष दल नेपालीं कांग्रेसं धाःसा संविधानसभाया म्याद थप यायेगु प्रस्तावयात असफल यायेगु रणनीति दयेकाच्वंगु खँ सीदुगु दु ।
उकिया नितिं कांग्रेसं थौं सुथय् ११ बजेनिसें ४ बजे तक संविधानसभाय् दुथ्याःगु चिचीधंगु दलया नेतातलिसे सहलह ब्याकेगु ग्वसाः ग्वयातःगु दु। विशेष यानाः मधेसवादी दलया नेतातलिसे कांग्रेसं सहलह यानाच्वंगु दु। थौं राष्ट्रिय प्रजातन्त्र पार्टी, राष्ट्रिय जनशक्ति पार्टी, नेपाल मजदुर किसान पार्टी नापं मेमेगु पार्टीयात नं सःतातःगु दु।
जेठ १४ न्ह्यः हे शान्ति प्रक्रिया व लोकतान्त्रिक संविधान निर्माण बारे सरकार व माओवादीं लिखित रुपं प्रतिबद्धता मबीकं संविधानसभाया म्याद थप मयायेत सरकारय् दुमथ्याःगु फुक्क दलत नापं जानाः वनेगु नितिं थौं सहलह ज्याझ्वः तयातयागु खः ।
न्हूगु सहमति मजूसा दुर्घटना
राष्ट्रपति डा. रामवरण यादवं लोकतान्त्रिक ब्यवस्था स्थापना यायेत आः तःधंगु हाथ्या वयाच्वंगु दु धयादीगु दु। मुलुकया राजनीतिक अस्थिरतां यानाः लोकतन्त्र खतराय् लाना वनाच्वन धकाः नं वय्कलं धयादिल। थनिंनिसें यलय् न्ह्याःगु साउथ एसियन म्यानेजमेन्ट फोरमया ११ क्वःगु सम्मेलनयात संवोधन यायेगु झ्वलय् राष्ट्रपति यादवं अथे धयादीगु खः। वय्कलं नेपाःया राजनीतिक दलतय्गु दथुइ याकनं हे न्हूगु कथंया सहमति मजुल धाःसा देशय् तःधंगु दुर्घटना जुइफु धकाः नं धयादिल। तर वय्कलं गुगु कथं छु दुर्घटना जुइ धकाः धाःसा स्पष्ट यानामदी ।
