आखिर छु ले परधर्म धाःगु?

शिशिल चित्रकार

थौं देशय् व विश्वन्यंकं हे भयावह अवस्था ब्वलना वःगु दु । देश व समाजया थीथी लागाय् चरम अराजकता, भ्रष्टाचार, अव्यवस्था, स्तरहीन निर्माण, उत्पादन, छखे श्रोत साधनया चरम दुरुपयोग जुयाच्वंगु दुसा मेखे अभाव, गरीबी, भुखमरी, बेरोजगारीया व्यापक समस्यात खने दु। थन समाजय् गज्याःगु विकृति व विसंगति दु धकाः धलः दयेकल धाःसा अपरम्पार जुइ। छुं छुं दसु कथं पासपोर्ट काण्ड, नक्कली नागरिकता, नक्कली जग्गाधनी, नक्कली कल कारखाना, नक्कली शैक्षिक दसिपौ, नक्कली डाक्टर, नक्कली वासः, नक्कली प्रगति विवरण, नक्कली सूचना, नक्कली व प्रायोजित खवर आदि गुलि दु गुलि दु ।

थ्व नक्कलीया बिगबिगि गय् यानाः बढे जूगु? गनं थःगु मानव धर्म त्वःताः पशु, कीकाय्तय्गु धर्म नाला काःवःगु जकं मखुला? थन समाजय् छगू धर्मं मेगु धर्म परिवर्तन याये मजिउ धकाः धायेगु याः। अथे ला थन थीथी सम्प्रदाययात धर्मया नामकरण जुयाच्वंगु नं खनेदु। अले वहे अनुरुप छगू धर्मं (सम्प्रदायं) मेगु धर्मय् वने मजिउ धाइगु खः। तर वास्तवय् धर्म व अधर्म जकं छुटे जुइमाःगु खः न कि हिन्दू, बौद्ध, ईस्लाम, विर्कश्चियन धर्म आदि। थुपिं ला दक्व सम्प्रदाय कथं जक नालेगु, अले थीथी कथंया परम्परा, संस्कृति फरक जक जूगु धकाः भाःपीमाःगु खः।
थांैयागु संसारय् भय अन्तराय बढे जुयावंगु निश्चित खः अले समाजया धापू धर्म परिवर्तन याये मजिउ धाःगु वचनयात गज्याःगु कथं थुइकेगु? गीताया वचन खः 'स्वधर्म निधनं श्रेय, परधर्मो भयावह' - स्वधर्मय् जुइगु मृत्यु बांलाः तर मेगु धर्म भयावह। थ्व वचन कथं छगू सम्प्रदायं मेगु सम्प्रदायय् वनेगु भयावह धाःगु ला? छगू परम्परा त्वःताः मेगु परम्परा माने यायेगुयात भयावह धाःगु ला? अथे ला परम्परा, संस्कृति धइगु ला छगू सम्प्रदायया नं ई कथं हिला हे वनाच्वनीगुली शायद शंका दइ मखु। झीगु हे खँ ल्हायेगु खःसां गुलिखे नेवाः परम्परा बुलुहुँ न्हना वन, वनीगु अवस्थाय् दुसा विश्व संचार जगतया हुनिं गुलिं पश्चिमी संस्कृति माने यायेगु याना हयेधुंकल (भ्यालेन्टाइन डे, कीशमश, आदि)। छु थुकियात मेगु धर्म नालाकाःगुलिं झन भयावह जुल धायेगु ला?

विश्वय् थीथी कथं भयावह अवस्था बढे जुयावःगु ला निश्चित खः। थीथी सम्प्रदायया दथुइ लडाइँ, ज्वालामुखी विस्फोट, सुनामी, राजनीतिक आन्दोलन, आतंकवाद, आतंकवाद निमूर्लया नामय् जुइगु सैनिक अतिवाद, व्यक्तिगत स्वतन्त्रताया अपहरण, मानव अधिकारया अपहरण, मनूया म्वायेगु नैसर्गिक हक अधिकार शोषण आदि इत्यादि अले थीथी कथंया दुर्घटना धइगु हे भयाह अवस्था वःगु मखु ला? थज्याःगु भयावह अवस्था बृद्धि जूगुया कारण ला छगू सम्प्रदायं मेगु सम्प्रदायय् परिवर्तन जूगुलिं जूगु मखु जुइमाः। अथे खःसा गीताया वचनया सार छु ले?

मनूतय्सं यायेमाःगु ज्या मयासे पशु पंछि, की आदितय्सं याइगु ज्या याना जुइगुयात परधर्म धाःगु जकं मखुला? मनूतय्सं कतःयात घात यानाः थःत जक फाइदा याइगु ज्यायात परधर्म धाःगु जकं खः ला? कर्मचारीतय्सं अफिस संगठनयात बेफाइदा यानाः स्वाभिमान मीगु ज्यायात परधर्म धाःगु मखुला? नेतातय्सं समाज, देशया हक हितया पलेसा व्यक्तिगत स्वार्थया लागि देशया इज्जत स्वाभिमान मीगुयात जकं परधर्म धाःगु मखुला? कर्मचारी प्रशासन राजनीति, उद्योग व्यापार, शैक्षिक, न्यायिक आदि क्षेत्रय् तत्तत् मनूतय्सं तत्तत् निकायया नीति नियम कथं ज्या मयासे व्यक्तिगत स्वार्थया लागि कमिशन, भ्रष्टाचार, घूसखोरी आदि थेंज्याःगु ज्या यायेगु व याकेगु धइगु व्यक्तिया स्वधर्म (थःगु संस्थाया, समाजया हितया ज्या) त्वःताः परधर्म नाला काःगु धायेगु कि मधायेगु? थज्याःगु पर-धर्मयात हे गीताय् भयावह धाःगु थें च्वं। अले वहे अनुरुप परधर्मी मनूत अप्वः जुसेंलि, परधर्म बढे जुसेंलि विश्वन्यंकंया समाजय् भयावह बढे जुल धकाः छुकिया आश्चर्य? छुकिया दुःख?

समाजय् भयावह अवस्था छसिकथं सुधार यायेया लागिं मनूतय्सं स्वधर्म (खःगु, भिंगु, अले कतःयात बेफाइदा मजुइगु ज्या) माने यायेया लागिं कुतः यायेमाःगु दु।
थन धम्मपदया निगू श्लोक न्ह्यथनेगु पाय्छि जुइ।
यथा'पि भमरो पुप्फं�वण्णगन्धं अहेठयं।
पलेति रसमा'दाय�एवं गामे मुनीचरे।।
अर्थ: भम्बलं स्वांयागु वर्ण व गन्धयात मस्यंकुसे स्वांयागु रस कया वनी थें मुनीपिं गामय् विचरण यानाच्वनी। ( गाथा ४९ )
सहस्सम'पि चे वाचा-अनत्थपदसंहिता।
एक अत्थपदं सेय्यो-यं सुत्वा उपसम्मति।।
अर्थ: अनर्थपदं युक्तगु खँ द्वलंद्वः ल्हायेगु सिबें युक्तगु खँ छगू जक ल्हायेगु उत्तम गुगु खँ न्यनाः शान्ति प्राप्त जुइ।
थ्व निगू गाथायात झीगु समाजं तःधंगु शिक्षा कथं नाला काये फुसां नं सुनान छुं कथं ज्या यायेबलय् मेपिंत गज्याःगु लिच्वः (बांमलाःगु?) लाइ धकाः सचेत जुइ फइसा अले ज्याख्यले मजूगु खँ ल्हायेगु नं मजुइ। थथे जुयाः सही अर्थय् मानव धर्मया परिपालक जुइसा, कतःयात, समाजयात, ज्याकूयात, देशयात बाधा जुइगु परधर्म माने यायेगुपाखें बचे नं जुइ। अथे जुइगु अवसर खंका च्वने फत धाःसा तिनि वास्तविक रुपय् स्वधर्मय् जुइगु मृत्यु हे बांलाइ तर मेगु धर्म थः स्वयं व समाजया लागि हे भयावह जुइ। उकिं समाजया प्रत्येक ख्यःया मनूतय्गु हाथ्या खः थःगु धर्म (मानव धर्म, भिंगु ज्या, कतःयात नोक्सान मयायेगु) म्हसीका, परधर्म (समाज, ज्याकू, देशयात बेफाइदा जुइगु ज्या) त्वःतेगु ।

थ्वहे झ्वलय् २५५५ क्वःगु स्वांयाः पुन्हिया लसताय् देय् व समाजया हक हितया लागिं मानव धर्म ( स्वधर्मं) माने याये फयेमा, देशय् समाजय् शान्ति समृद्धि जुइगु अवसर चुलायेमा धकाः मनंतुना। दक्वसियां भिं जुइमा !

More Stories Like this