पश्चिम बंगालया चुनावी लिच्वः

भारतय् नकतिनि क्वचाःगु थीथी प्रान्तया चुनाव मध्ये नेपाःया सीमालिसे स्वाःगु पश्चिम बंगालया लिच्वः विश्वय् हे चर्चाया विषय जूगु दु। अन वंगु ३४ दँ न्ह्यवंनिसें एकछत्र राज याना वयाच्वंगु कम्युनिष्ट सत्तायात क्वःथलाः न्हापांखुसी गैर वामपन्थी शक्तिं सरकारचले याइगु जूगु दु। छगू इलय् कंग्रेस पार्टीपाखें कुचा जुयाः गठन जूगु तृणमुल कंग्रेसं थ्व चुनाव त्याकूगु खःसा आः उकिया हे अध्यक्ष ममता बनर्जी मुख्यमन्त्री जुयाः सरकार गठन याइगु जूगु दु ।

३४ दँ न्ह्यवंनिसें राज न्ह्याका वयाच्वंपिं वामपन्थीतय्त जनतां छाय् चीकल? थ्व भारत जक मखु नेपाः लगायत विश्वया फुक्क हे वामपन्थीतय्सं विश्लेषण यायेमाःगु विषय खः। भारतया वामपन्थीतय्सं विश्वय् हे न्हापांखुसी चुनाव त्याकाः नं वामपन्थी सत्ता स्थापना यायेफु धकाः क्यना बिउगु खः। ३४ दँ लिपा चुनावं हे वामपन्थीतय्त सत्ताच्युत यायेफु धकाः नं क्यना बिउगु दु। थुकियात आमरुपं याःगु प्रमुख विश्लेषण धइगु ३४ दँ तक छगू हे कथंया शासन न्ह्याकाः जनतायात परिवर्तनया छुं हे आभास मबिउगुया लिच्वः खः धाःगु दु। वंगु छगू दशक न्ह्यवंनिसें भारतं आर्थिक विकासया गुगु गति ज्वंगु खः उकिं पश्चिम बंगाल अछूत थें जूवंगु दु। उकिं नं जनतां न्हूगु हिउपाः चाहे जुइगु स्वाभाविक खः ।

खतुं चुनावय् बूसां पश्चिम बंगालया वामपन्थीत अझ नं कमजोर धाःसा जूगु मदुनि। संसद सीट यक्व बूसां भोटया ल्याः धाःसा ६ प्रतिशतं जक म्हो खः। उकिं चुनाव त्याका वःगु तृणमुल कंग्रेसयात पश्चिम बंगालय् शासन याये अझ नं अःपुइ धाःसा मखुनि ।

More Stories Like this