भारतीय डाँकातपाखें नेपाःया वस्तीइ लुटपाट
येँ (झीगु स्वनिगः)
भारतनाप स्वानाच्वंगु नेपाःया बाँकेया पचपोखरा गामाय् म्हिगः आइतवाः सुथय् हे भारतीय डाँकात वयाः लुटपाट याःगु दु । दर्जनौंया ल्याखय् खुकरी, तरवार नापं ल्वाभःत ज्वनाःवःपिं भारतीय लुटेरातय्सं नेपाःया वस्तीइ हे वयाः छेँय् छेँय् वनाः लुटपाट याःगु खः । इमिसं द्वलंद्वः तका ध्यबा नाप नाप तिसा तकं लुटेयानाः यंकूगु दु धकाः स्थानीय प्रहरीं धाःगु दु । घटनास्थलय् सशस्त्र प्रहरी व नेपाल प्रहरीत थ्यंगु ई तकया दुने इपिं लुटेरात भारतपाखे बिस्युं वने धुंकूगु खः धकाः धाःगु दु ।
लुटेरातय्सं नेपाःया मिसापिन्त तकं हातपात याःगु नापं दुब्यवहार याःगु खः धकाः स्थानीय मनूतय्सं धाःगु दु । स्थानीय मनूतय्सं भारतीय उपिं लुटेरात भारतीया सीमा सुरक्षा बल -एसएसपी)पाखें हे संरक्षण बियातःपिं खः धकाः आक्रोश प्वंकेगु ज्या याःगु दु । लुमंकेबहःजूगु भारतया सीमा लागाय् भारतया डाँकात नाप नापं प्रहरीतय्सं तकं नेपाःमितय्त दुःख बियाः वयाच्वंगु बुखँ इलय् ब्यलय् पिहां वयाच्वंगु दु ।
