थ्वहे सरकारयात राष्ट्रिय सरकार दयेके : नेता भट्टराई
विराटनगर (झीगु स्वनिगः)
एकीकृत नेकपा माओवादीया न्वकु डा. बाबुराम भट्टराईं झलनाथ खनालया नेतृत्वया सरकारयात हे माओवादीं राष्ट्रिय संयुक्त सरकारया रुपय् प्राथमिकता बिइगु जानकारी बियादीगु दु । आइतवाः विराटनगरय् सञ्चारकःमिपिंलिसे खँल्हाबल्हा यानादिसें नेता भट्टराईं थज्याःगु खँ धयादीगु खः । नेपाली कांग्रेस व मधेशवादी लगायतया फुक्क दलतय्त सहमतिइ हयाः राष्ट्रिय संयुक्त सरकार दयेकेगु कुतः जुयाच्वंगु वय्कःया धापू खः ।
जेठ १४ गते न्ह्यः हे राष्ट्रिय सरकार दयेकेमाःगु धयादिसें नेता भट्टराईं राष्ट्रिय सहमति मजुयाः शान्ति प्रकृया व संविधान दयेकेगुलिइ नं बिलम्ब जूगु जानकारी बियादीगु दु । वय्कलं फुक्कसित मान्य जुइगु आधार क्वःछीना न्ह्यःने न्ह्यायेगु विकल्प मदुगु खँय् नापं बहः बियादीगु दु ।
