माथिल्लो तामाकोशीया शिलान्याश याइगु

दोलखा (झीगु स्वनिगः)

ऊर्जा राज्यमन्त्री रामजीप्रसाद शर्मां माथिल्लो तामाकोशी आयोजनाया शिलान्याश उर्जा सङ्कट समाधानया नितिं सरकारी कुतःया नमूना जूगु धयादीगु दु । देय् ऊर्जा सङ्कटय् न्ह्यानाच्वंगु धयादिसें शर्मां माथिल्लो तामाकोशी आयोजना निर्माणलिपा देशं ऊर्जा सङ्कटपाखें मुक्ति दइगु धयादीगु दु । दोलखा सदरमुकाम चरिकोटय् शनिवाः ग्वसाः ग्वःगु पत्रकार सम्मेलनय् न्वंवानादिसें राज्यमन्त्री शर्मां थज्याःगु बिचाः प्वंकादीगु खः । वय्कलं तामाकोशी आयोजना इलय् हे क्वचायेकेगु नितिं माःगु प्राविधिक लिसे विस्फोटक पदार्थया व्यवस्था यायेत अधिकार सम्पन्न शक्तिशाली आयोग दयेकेगु व आयोजनाया उपकरण आयातय् विशेष छ्यापं बिइगु खँय् नं सरकार न्ह्यःज्यानाच्वंगु धयादीगु दु ।

वर्तमान सरकार लोडसेडिङ क्वचायेकेगु नितिं अल्पकालिन व मध्यकालिन योजनालिसे न्ह्यःने न्ह्यानाच्वंगु जानकारी बियादिसें वय्कलं थौंकन्हय् प्राधिकरणया व्यवस्थापकीय सुधार व चुहावट नियन्त्रणय् सरकारं च्यूताःलिसे न्ह्यःज्यानाच्वंगु नं वय्कलं धयादीगु दु । मेगु छगू प्रसङ्गय् राज्यमन्त्री शर्मां संविधानसभाया ई तनेगुया विकल्प मदुगु धयादीगु दु । संविधानसभाया ई मतंसा जेठ १४ गते ल्यूने देशय् विकराल अवस्था वइगु ख्याच्वः नापं बियादीगु दु । माथिल्लो तामाकोशी आयोजना प्रधानमन्त्री झलनाथ खनालं छगू समारोहया दथुइ जेठ ४ गते शिलान्यास याइगु ज्याझ्वः क्वःछिनातःगु दु । शिलान्याश ज्याझ्वलय् फुक्क राजनीतिक दलया शीर्ष नेतात, सरकारया मन्त्रीत, उच्च पदस्थ अधिकारीपिनिगु ब्वति दइगु जानकारी नं ब्यूगु दु ।

कूल स्वीन्यागू अर्ब नीगुंगू करोड लागत धुकुमाः यानातःगु माथिल्लो तामाकोशी आयोजनाया नितिं वित्तीय व्यवस्थापन पूवंगु आयोजनां जानकारी ब्यूगु दु । लिपांगु खुसिया आयोजनां नेपाल टेलिमकलिसे थ्यंमथ्यं खुगू अर्ब बराबरया ऋण सम्झौता याःगु खः । सन् २०१५ तक्कयादुने दयेकेगु ज्या क्वचायेकाः माथिल्लो तामाकोशी आयोजनापाखें व्यापारिक विद्युत उत्पादन यायेगु लक्ष्य तयातःगु दु ।

More Stories Like this