मनकामनाय् बखुं ब्वयेके मन्त
येँ -झीगु स्वनिगः)
सामन्यतया बखुं धायेवं शान्तिया प्रतिक कथं नालाकाइ । शान्तिया प्रतिक बखुंयात न्ह्यागु थासय् नं ब्वयेकेगु याइ । विशेष यानाः द्यः व सम्पदा लागाय् मनूतय्सं बखुं खनाच्वंगु दइ । गुलिं गुलिसिनं द्यःयाथाय् हे हयाः बखुं त्वःतेगु याइसा गुलिसिनं बखुंयात नसा तकं बिइगु याइ । अले गुलिसिनं ला बखुं ब्वःगु इलय् वइगु फय् शरिरया नितिं तसकं बांलाः धकाः तकं धाइ । बखुंया बारे यक्व हे ब्याख्या याःसां आखिर छगू प्रमुख सम्पदा स्थल मनकामनाय् धाःसा बखुं त्वःतेगुलिइ प्रतिबन्द तयाब्यूगु दु ।
लिपांगु इलय् वयाः भक्तजनतय्सं मनकामना द्यःयाथाय् वनाः बखुं त्वःतेगु यक्व हे यानाहःगु दु । थ्व हे झ्वलय् मनकामना क्षेत्र विकास समितिं जेठ महिनांनिसें लागू जुइगु कथं अन बखुं ब्वयेके मदु धकाः प्रतिबन्ध हे तयाब्यूगु दु । छुं जुयाः बखुं ब्वयेकल धाःसा इमित कडा कारवाही यायेगु धकाः तकं ख्याच्वः ब्यूगु दु । अथे व्यवस्थापन समितिं नियम दयेकाः लागू याःगुया मू कारण धैगु बखुंत अप्वया मनकामना लागाय् तसकं फोहर जूगुलिं खः । बखुंतय्सं खि फानाः अन फोहर जूगु नापं अनया वातावरणय् तकं लिच्वः लाःगुलिं धकाः अथे बखुं ब्वयेके मदुगु लागा कथं न्ह्यब्वःगु खः । न्हापांनिसें बखुं ब्वयेके मदु धाःसां नं अन मनूतय्सं सुलाः सुलाः बखुंया ब्यापार यानाच्वंगुलिं हे अथे कडा यायेमाःगु अवस्था वःगु खः धकाः समितिं धाःगु दु । अथे कडा याःगुलिं आः बखुंत गुलि दैगु खः व धाःसा स्वयेगु ल्यं हे दनि ।
