कांग्रेसया प्रतिगमनकारी सोच

थःयात प्रजातन्त्रया मसिहा तायेकीम्ह नेपाली कांग्रेस सत्तां पिनेच्वंगु स्वला लिपाहे थःगु प्रतिगमनकारी सोच न्ह्यःने हःगु दु । राजनीतियात थःपिनिगु व्यक्तिगत व वर्गिय स्वार्थ पूवंकेगु हतियार दयेकाः देशयात व नेपाली जनतायात गालय् क्वफानाः देय्यातहे अनिर्णयया वन्दी दयेकाः वयाच्वंम्ह नेपाली कांग्रेसं हानं म्वाःमदुगु शर्त न्ह्यःने तयाः थःपिं प्रजातन्त्रवादी मखु प्रजातन्त्र व परिवर्तनया विरोधीया रुपय् थंगु दु ।
जेठ १४ गते लिक्क वयाच्वंगु व उगु ई दुने संविधान दयेके मफैगु खँ स्पष्ट दयेक दयेकं नं नेपाली कांग्रेसं संविधान सभाया ई थपय् मयायेगु तर माओवादी व एमाले दथ्वी ७ गू वुंदे सहमति खारेज यानाः वर्तमान प्रधानमन्त्री झलनाथ खनालया नेतृत्वय् गठन जूगु सरकार विघटन यानाः सेना समायोजनया नितिं ठोस योजना व कार्यान्वयनया विस्वस्त आधार दयेकल धाःसा संविधानसभाया म्याद थपय् यायेगु थःपिनिगु माग वा सर्त न्ह्यःने हःगु दु । थ्व माग गैरराजनीतिक व निर्लजताया पराकाष्ठा खः ।

संविधान सभाया म्याद थपय् यायेगु खँ छुंनं पार्टी व सुंनं व्यक्तिया लहरया खँ मखु । ई अप्वः ल्यंमदयेवं सहमतिया नितिं वा छलफलया नितिं ई थपय् यायेगु धयागु सकसिगुं नितिं खः । तर नेपाली कांग्रेसं थ्व केवल सरकारय् सहभागी दल व उकिया नेतातय्गु व्यक्तिगत स्वार्थया विषयवस्तु थें दयेकाः ई थपय् यायेगु खःसा जिमिगु फलाना फलाना माग वा सर्तत पूवंकेत धाःसा म्याद तनाव्यू मखुसा मयायेगु धयाः कांग्रेस थः अवसरवादीया १ नम्वरया रुपं न्ह्यःने वःगु दु । टाक परे तिवारी, नत्र गोतामेया नीतिं कथं । शान्ति प्रकृया, संविधान व सरकार परिवर्तन थुपिं स्वंगू विषय न छगूहे मखु । सरकार परिवर्तन आःया विषय हये मखुसा, सेना समायोजन व संविधान निर्माण नाप नापं वनीगु खँ खः । सरकार दयेके मफयाः विश्वया न्ह्यःने नेपाःया वेइज्जत जुयाच्वंगु इलय् माओवादी नायः पुष्पकमल दाहाल प्रचण्ड व एमालेया नायः झलनाथ खनालया दथ्वी न्हय्गू बुंदे सहमतिया आधारय् वर्तमान सरकार दयेकूगु लिं स्वला मदुवलय् निसें सरकारया असफलता, सरकारया राजिनामा फ्वनेगु धयागु गलत चिन्तन व प्रतिगामी सोच खः । आः सरकार विघटनहे यात धाःसा नं नेपाली कांग्रपेस व मधेसवादी दलतय्के सरकार दयेकेत न क्षमता दु नत सामर्थ । थुज्वःगु अवस्थाय् सरकार विघटन मांग यायेगु कांग्रेसया पागलपन व प्रतिगामीसोच वाहेक मेगु छुंहे मखु ।

संविधानसभाया म्यादतनेगु खःसा कांग्रेसं मेगु शर्त नं न्ह्यःने तःगु दु । सेनासमायोजनया नितिं ठोस आधार न्ह्यःने हयाः सेना समायोजनयात कार्यान्वयनपाखे वन धाःसा म्याद थप यायेगु धाःगु दु । थ्व खँ नं अनुचित खः । सेना समायोजनया खँ ल्हाइम्ह कांग्रेसयाके राष्ट्रिय सुरक्षा सम्वन्धी छु खाका न्ह्यःने तयेफुगु धकाः ई नि व्यः जुइक सेना समायोजनया खँ न्ह्यःने हयेगु ? सेना समायोजन जुइ तर थुया न्ह्यः राष्ट्रिय सुरक्षा सम्वन्धी निति निं दयेकेगु आवश्यक जुइसा मेख्य संविधान निर्माण प्रकृया विशस्तरुपं न्ह्यःने मवेकुं सेना समायोजन सम्भव मदु । उकिं संविधान दयेकेगु नितिं छुं मयायेगु अले अर्थ नि व्यर्थ जुइक म्याद थपय् यायेगु खँय् अस्वभाविक जक मखु असम्भव शर्त व मागत न्हयःने हयां कांग्रेसं छाय् पंग थना च्वन ? संविधान दयेेकेगु लँपुइ प्वाःतीत स्वयाच्वन ? थ्व वइगु प्रतिकृयावादी व प्रतिगामी सोच खः । म्यादला कांग्रेसया सहमति मदुसां, मव्यूसां थपय् जुइ । थुलि निश्चित खः ।

More Stories Like this