जनजाति राष्ट्रिय मोर्चाया संघर्षया ज्याझ्वः

येँ (झीगु स्वनिगः)

आदिवासी जनजाति आन्दोलन राष्ट्रिय मोर्चां वंगु शुक्रवाः याःगु वन्दया ज्याझ्वःया झ्वलय् सरकारी पक्षं वार्ताया नितिं जूगु आव्हानयात कयाः जनजाति महासंघया नायः राजकुमार लेखीं संचारकर्मीतलिसे खँल्हासें धयादिल 'शान्तिमन्त्री नाप वार्ता यानाः छुं नं जुइगु अवस्था खनेमन्त, आः जिपिं कार्यकारी प्रमुखया उपस्थितिइ जक वार्ता यायेगु जुइ ।'

वार्ता व आन्दोलनयात नाप नापं यंकेगु जुइ धयादिसें वय्कलं संघर्षया न्हूगु ज्याझ्वः कथं थौं सोमवाःनिसें देय्न्यंकंया स्थानीय निकायसं याःगु ध्यबा सार्वजनिक लेखाजोखा यायेगु, जनगणना ज्याझ्वः मयाकेगु, १० गते प्रमुख दलया केन्द्रीय ज्याकुथिइ धर्ना बिइगु, ११ गते संविधानसभाया भवन न्ह्यःने धर्ना च्वनाः जनप्रदर्शन यायेगु धकाः घोषणा याःगु दु । जनप्रदर्शन ज्याझ्वः १४ गते तक जारी जुइ । उगु मोर्चां आदिवासी जनजातिया अधिकार सुनिश्चित जूगु संविधानया एकीकृत मस्यौदा सार्वजनिक नापं १२ सूत्रीय माग तयाः दबावमुलक ज्याझ्वः यानाः वयाच्वंगु दु ।