वार्ता टोलीइ स्वंगू दलया नायःतनं दुथ्याके माःगु माग

जनजातितय्गु ११ गतेनिसें येँय् लगातार जनप्रदर्शन

येँ (झीगु स्वनिगः)

आदिवासी जनजाति आन्दोलन राष्ट्रिय मोर्चा, नेवाः स्वायत्त राज्य मंकाः संघर्ष समिति व ताम्सालिङ संयुक्त संघर्ष समितिया मंकाः ग्वसालय् जूगु म्हिगः आइतवाःया मुँज्यां आदिवासी जनजातिं थीथी संघर्षया झ्वलय् न्ह्यथंगु संघीयता, स्वायत्तता, आत्मनिर्णयया अधिकार, जातीय अग्राधिकार व धर्मनिरपेक्षताया नितिं संविधानसभायात निरन्तर दवाव वियावनेगु कथं संघर्ष यानावनेगु क्वःछ्यूगु दु । उगु भेलां संघर्षया ज्याझ्वः एकीकृत व व्यवस्थित यायेत आदिवासी जनजाति संयुक्त संघर्ष समिति नं गठन याःगु दु । उगु संघर्ष समितिइ आदिवासी जनजातिया संघर्षया मुद्दायात समर्थन याइगु दक्व संगठनत दुजः जुइगु क्वःछ्यूगु लिसें झिंन्हय्म्हेसियागु सचिवालय नं नीस्वंगु दु । म्हिगः हे च्वंगु सचिवालयया मुँज्यां संघर्षया ज्याझ्वः सार्वजनीक यायेत कन्हय् मंगलवाः न्हिनसिया १ बजे पत्रकार सम्मेलन याइगु धाःगु दु ।

सचिवालयया मुँज्यां न्हियान्हिथंया ज्या न्ह्याकेगु कथं सुरेश आलेमगर, मल्ल के सुन्दर, राजकुमार लेखी, परशुराम तामाङ व सोनु लामा दुगु संयोजन मण्डल नीस्वंगु खः । संघर्षया ज्याझ्वः कथं संविधान सभाया आदिवासी जनजाति ककसं संविधान सभाया रोष्टम घेराउ यायेगु, माओवादी, कांग्रेस व एमालेया कार्यकर्तातय्स जनजाति सभासद्तय्त अनिवार्य उपस्थित याकाः थःथःगु पार्टीया केन्द्रीय ज्याकुथिइ धर्ना विइगु लिसें जेठया ११ गते निसें १४ गते तक निरन्तर संघर्षया ज्याझ्वः पितबिइत्यंगु सिइदुगु दु । ज्याझ्वः कथं जेठ ११ गते संविधानसभा भवन जःखः ठप्प जुइक लखौं मनूत सतकय् क्वकायाः बृहत जनप्रदर्शन यायेत्यंगु नं जानकारी वःगु दु । संघर्ष समितिं संघर्षया नाप नापं वार्ताया रणनीति नं छ्यलेत्यंगु धाःगु दु, तर वार्ताय् प्रधानमन्त्री, सभामुख लिसें स्वंगु मू राजनीतिक दलया शिर्षस्थ नेतृत्वं नं उपस्थित जुइमाःगु शर्त तयेगु व अथे मजुल धाःसा उघ्रिमय वार्ता त्वःताः वयेगु जुइ धकाः नं क्वःछ्यूगु धाःगु दु ।