माओवादीपाखें विद्यार्थी स्वयंसेवक घोषणा

येँ (झीगु स्वनिगः)

एकीकृत नेकपा -माओवादी)पाखें विद्यार्थी स्वयंसेवक घोषणा याःगु दु । एकीकृत माओवादीया न्वकु नारायणकाजि श्रेष्ठ प्रकासं छगू ज्याझ्वःया दथुइ म्हिगः आइतवाः अथे स्वयसेवक घोषणा याःगु खः । वय्कलं संविधानसभायात भंग यात धाःसा नेपाःया अस्तित्व धरापय् लाइ धयादिल ।
अथेहे, नेपाल असफल राष्ट्र जुइ धयादिसें नेता श्रेष्ठं आः तकया दुने प्राप्त याःगु उपलब्धि सितिं वनी धयादिल । वय्कलं न्वंवायेगु झ्वलय् संविधानसभा भंग जुल धाःसा जनयुद्धथें हे मेगु युद्ध जुइगु खतरा ब्वलनी धकाः नं धयादिल । विद्यार्थी स्वयमसेवकया कजि रमेश मल्लयात घोषणा याःगु खः । वय्कः अखिल क्रान्तिकारीया केन्द्रीय न्वकु खः । येँया त्रिचन्द्र कलेजं द्वलंद्वःम्ह विद्यार्थीया जुलुस पिकाःगु खःसा उगु जुलुस न्यूरोड जुयाः बसन्तपुरय् थ्यंकाः सभा यानाः क्वचायेकूगु खः । उगु सभाय् अखिल क्रान्तिकारीया नायः हिमाल शर्मा नापं मेमेपिन्सं न्वंवानादीगु खः । समारोहया सभापति पुलांम्ह अखिल क्रान्तिकारीया नायः लेखनाथ न्यौपाने जुयादीगु खः ।