'१४ न्ह्यः हे समायोजनया खाका’

उप समितिया म्याद १३ गते तक थप

येँ (झीगु स्वनिगः)

प्रधानमन्त्री नापं एमालेया नायः झलनाथ खनालं वइगु जेठ १४ गते न्ह्यः हे माओवादीया सेना समायोजनया खाका वइ धकाः धयादीगु दु । वय्कलं समायोजनय् वनीपिं माओवादीया लडाकुया ल्याः नापं सेना समायोजन नापं पुनस्र्थापना सम्वन्धी खाका वइ धकाः धयादीगु दु । शान्ति व संविधानया नितिं पत्रकारतय्सं ज्ञापनपत्र लःल्हाःगु झ्वलय् म्हिगः आइतवाः प्रधानमन्त्री खनालं अथे धयादीगु खः ।
वय्कलं जेठ १४ न्ह्यः हे लडाकु समायोजनया मोडालिटी, मापदण्द, पुनःस्थापनया विधि व समायोजन जुइपिं लडाकुया ल्याः नापंया खाका वइ धकाः नं धयादिल । प्रधानमन्त्री खनालं धयादिल 'दलतय्गु दथुइ तसकं हे दुग्यंक सहलह जुयाच्वंगु दु, छुं दिंया दुने हे सहमति जुइ तर आः जितः न्यनेमते गन व गुकथं जुयाच्वन ? धकाः' वय्कलं संविधानसभाया म्याद थपेयाये न्ह्यः हे संविधान निर्माणया विषयसं नं ठोस सहमति जुइ धकाः दावी यानादिल ।

दलतय्गु दथुइ जुयाच्वंगु मतभिन्नतायात म्हो यायेत, संविधानया मस्यौदा तयार यायेत, जनताया दथुइ वनेत, जनताय् सहलह यायेत, सुझाव कयाः एकीकृत मस्यौदा तयार यायेगु व उकियात संविधानसभापाखें पारित यायेत माःगु ईया आधारय् संविधानसभाया म्याद थप यायेगु जुइ धकाः स्पष्ट नं यानादिल । थ्व हे दथुइ संविधानसभाया संवैधानिक समिति अन्तर्गत उप समितिया म्याद हाकनं थप याःगु दु । म्हिगः आइतवाः सिंहदरवारय् च्वंगु संवैधानिक समितिया मुँज्यां अथे उप समितिया म्याद १३ गते तकया नितिं थप याःगु खः । न्हूगु संविधानया नितिं विवाद जुयाच्वंगु विषय ज्यंकेत दयेकूगु उगु उप समितिया म्याद फुनाः ज्या याये मफया च्वंगु खःसा चिचीधंगु स्वंगू दल नापं छम्ह स्वतन्त्र सांसदनापं यानाः प्यम्हेस्यां मुँज्याय् तकं पंगः थनाः वयाच्वंगु खः । म्हिगःया मुँज्याय् नं इपिं सांसद्तय्सं थःपिनिगु माग पूरा यायेमाःगु माग यानादीगु खःसा अन न्वंवाये झ्वलय् माओवादीया नायः पुष्पकमल दाहाल प्रचण्डं प्यम्ह सभासद्तय्गु मागयात सकारात्मक रुपं कयादीगु खः । वय्कःपिनिगु माग पूरा यायेगु नितिं सर्वदलिय मुँज्या च्वनेगु धकाः तकं खँ जूगु खः । मुँज्याय् दलित जनजाति पार्टीया सभासद् विश्वेन्द्र पासवानं निर्णय पुस्तीका तकं लाकाः कयाः खुनाः छ्वयेगु याये त्यंगु इलय् संवैधानिक समितिया सभापति निलाम्बर आचार्यं मार्सल तकं लगेयायेत निर्दैशन बियादीगु खः । अबले हे पासवानं थःगु लं त्वःताः थः शान्तिवादी खः धकाः तकं धयादीगु खः ।

अनंलिपा मुँज्याय् पंगः थनाः वयाच्वंपिं सांसदतय्सं सभापति आचार्यया ज्याकुथिइ धर्ना च्वनेगु धकाः वंगु खःसा अबले वय्कः ज्याकुथिं पिहां वने धुकूगु खः । थौंया संवैधानिक समितिया मुँज्याय् प्रधानमन्त्री झलनाथ खनाल, नेपाली कांग्रेसया संसदीय दलया नेता रामचन्द्र पौडेल, नेपाः राष्ट्रिय पार्टीया बुद्धरत्न मानन्धर, संघीय लोकतान्त्रिक मञ्चया रुक्मिणी चौधरी नं न्वंवानादीगु खः ।