फुक्क हे जनजाति छथाय् च्वन

११ गते लखौं मनू सतकय् क्वकाइगु

येँ (सन्ध्या टाइम्स)/जातीय स्वायत्तता नापं स्वशासन सहितया राज्यया पुनर्संरचनाया नितिं नेपाःया आदिवासी जनजातितय्रसं मंकाः कथं आन्दोलन यायेगु नितिं आदिवासी जनजाति मंकाः संघर्ष समिति गठन याःगु दु। अलग अलग आन्दोलन यानाच्वंपिं फुक्कं आदिवासी जनजातितय् थौं सुथय् च्वंगु छगू वृहत् भेलां उगु संघर्ष समिति गठन याःगु खः। नेवाः स्वायत्त राज्य मंकाः संघर्ष समिति, ताम्सालिङ संयुक्त संघर्ष समिति नापं थीथी आदिवासी जनजातितय् दथुइ तःन्हु न्ह्यःनिसेंया कुतः कथं थ्व संघर्ष समिति दयेकाः आन्दोलनया ज्याझ्वः नं तयार याःगु खः ।

थौं नेवाः, ताम्सालिङ, खम्बुवान, लिम्बुवान, थरुहट आदि फुक्क हे जातीय आन्दोलनय् सक्रिय खलः पुचःतय्गु मंकाः बैठक च्वंगु खः ।

बैठकं गठन याःगु मंकाः संघर्ष समितिं थःपिनि तःधंगु ज्याझ्वःया रुपय् थ्वहे वइगु जेठ ११ गते येँय् जनजातिया छगू वृहत् प्रदर्शन यायेगु ज्याझ्वः दयेकूगु दु। वकुन्हु येँय् लखौं मनू क्वकयाः थःपिनि शक्ति प्रदर्शन यायेगु ताः तयातःगु दु ।

व स्वयां न्ह्यः जेठ ९ गते मू मू राजनीतिक दलया जनजाति कार्यकर्तातय्सं थःथःपिनि पार्टीया मू ज्याकुथी छगू हे इलय् धर्ना बीगु ज्याझ्वः नं दयेकूगु दु। लिसें संविधानसभाया म्याद थपे यानाः दलतय्सं राज्य पुनर्संरचनाया ज्यायात उखेथुखे यायेफुगु सम्भावना दु धासें अथे मयायेगु लागिं फुक्कं दलया नेतातय्त सचेत यायेगु ज्याझ्वः नं दयेकूगु दु ।

उकथं हे थ्व दौरानय् संसदया आदिवासी जनजाति ककसं संविधान सभा दुने नाराबाजी वा रोष्ट्रम घेराउ थेंज्याःगु ज्याझ्वःत यायेगु व संसद पिने जनजाति महासंघपाखें ज्याझ्वः यानाच्वनेगु निर्णय नं याःगु दु। लिसें न्हय्न्हु तक लगातार संविधानसभा घेराउ यानाच्वनेगु ज्याझ्वः बारे नं सहलह जूगु दु ।

आन्दोलन ब्यवस्थित यायेत मंकाः संघर्ष समितिया संयोजन मण्डल नं दयेकूगु दु। उकिया दुजः कथं मल्ल के सुन्दर, सुरेश आलेमगर, राजकुमार लेखी, सोनु लामा व परशुराम तामाङ च्वनादीगु दु ।

समितिं कन्हय् पत्रकार सम्मेलन यानाः संघर्षया ज्याझ्वः सार्वजनिक यायेत्यंगु दु ।