लादेन अमेरिकाया एजेन्ट: शंका

डी.आर.खड्गी

विश्वया जनता अति लोभी, स्वार्थी, हिंस्रक जुयाच्वंगु खँ प्रख्यात दार्शनिक कृष्णमूर्तिं धायेगु यानादी। थःगु स्वार्थया निंतिं मेपिनि हिंसा, हत्या यानां जक मगानाः मेगु देशयात तहसनहस तकं याना वयाच्वंगु दु। ६०-७० या दशकय् विश्वया निगू शक्तिशाली राष्ट्र सोभियत संघ व अमेरिकां विश्वया आपालं देशयात थःथःगु ल्हातय् तयातःगु खः। थ्व निगुलिं देशं थःगु ल्हातय् लानाच्वंगु देशय् थःगु स्वार्थ विपरित विद्रोह जुइगु खने दत कि प्रत्यक्ष रुपं सेना छ्वयाः वा मेमेगु षडयन्त्र यानाः विद्रोहीतय्त दबे याना छ्वइ।थुलि जक मखु थ्व निगुलिं देशया दथुइ धेंधेंबल्लाः जुया हे च्वंगु खः। अज्याःगु धेंधेंबल्लाः मेगु देशयात उपनिवेश वा अर्ध-उपनिवेशय् तयेगु निंतिं जुइगु खः। विशेष यानाः एशिया, अफ्रिका व ल्याटिन अमेरिकाया आपालं देशय् कि सोभियत संघया कतांमरि शासक दयाच्वनी कि अमेरिकाया कतांमरि शासक दयाच्वनी। अफगानिस्तानय् नं सोभियत संघ व अमेरिकाया धेंधेंबल्लाः जुयाच्वंगु खः। अफगानिस्तानय् रुसया फौज तयार जुइवं अमेरिकां रुसी फौज विरुद्ध संघर्ष याकल। अमेरिकां वहे इलय् चरमपन्थी मुस्मांत तयार यायेगु �वलय् साउदी अरबया ओसामा बिन लादेनया नेतृत्वय् नं अलग्ग चरमपन्थी मुस्मां लडाकु तयार यानाः रुसी सेना विरुद्ध ल्वाकल। अमेरिकां तयार यानातःपिं चरमपन्थी लडाकुतय्सं हायलकायल यानाः आखिरय् रुसी सेना लिहां वनेत बाध्य जुल। रुसी सेना लिहां वनेसात चांचां पाकिस्तान समर्थन तालिवानतय्सं अफगानयात कब्जा यानाः सत्ता ल्हातय् लाकल। तालिवानयात बिन लादेनया लडाकु दस्तां ग्वाहालि यानाच्वंगु कारणं तालिवान सरकार तसकं मजबुद जुयाच्वंगु खःसा तालिवानतय्सं अन आरामपूर्वक शासन नं यानाच्वंगु खः ।

गुगु इलय् कुबेतया घटना जुल, बिन लादेन अमेरिकी नीति खनाः तंचाल। कुबेत चिकंया धनी देय् खः। कुबेतया चिकं मालिकत अप्वः यानाः अमेरिकाया पूँजीपति हे जुयाच्वंगु खनेदु। कुबेतय् चिकं लिकायेगु झ्वलय् ईराकया भूमिइ तकं दुहां वनेगु यानाच्वंगु जुयाच्वन। कुबेतया चिकं कम्पनीतय्सं बदमासीपूर्ण ज्या यानाच्वंगु कारणं ईराकं कुबेतय् हमला यानाः थःगु अधिनय् काल।ईराकं कुबेत कब्जा यायेसातकि अमरिकां नं तम्वयाः ईराकी सेना विरुद्ध हमला यानाः कुबेत मुक्त याना बिल। अमेरिकां हमला यानाः यक्व मुस्मांतय्गु हत्या यायेगुली जक मखु अमेरिकाया पूँजीपतितय्सं कुबेतया प्राकृतिक सम्पत्ति लुटे यानाच्वंगुलिं नं लादेन अमेरिका खनाः मि जूगु खः। बिन लादेनं अल कायदा संगठन विस्तार यानाः पश्चिमी राष्ट्र व अमेरिकया नं धन-जन नाश यानाः हैरान याना हल। सन् २००१ सेप्टेम्बर ११ कुन्हु न्युयोर्कय् अमेरिकाया व्यापारिक केन्द्र ट्वीन टावर ध्वस्त यात। अमेरिकां नं अल कायदा संगठन ध्वस्त याना बिन। लादेनयात नं समाप्त यायेगु निंतिं अमेरिकां थःगु जासुसी संस्था सि.आइ.ए. सक्रिय यानाः विशेष सैनिक फोर्स परिचालन यात। अमेरिकाया ट्वीन टावर ध्वस्त याःगु द्वपं लादेनयात बियाः अफगानया तालिवान सरकार�यात लादेन सुपुर्दगी याये माल धकाः इनाप यात। तर अफगान सरकारं अस्वीकार यात धकाः अमेरिकां अफगानिस्तानय् नं आक्रमण यात। अमेरिकां अफगान ध्वस्त यानाः थःगु लखौं सेना आः नं तैनाथ याना तःगु दनि। अफगानयात थःगु मुठ्ठीइ तये धुंकाः अमेरिकां इराकयात ध्वस्त यायेगुपाखे पलाः न्ह्याकल। सन् २००३ पाखे इराकय् आणबिक शक्ति दु धइगु त्वहः तयाः इराकयात ध्वस्त यानाः इराकय् नं अमेरिकी सेना तैनाथ याना बिल। इराकया शासक सद्दाम हुसेनयात पतन याःगु कारण इजरायलयात सुरक्षित यायेत खः। छाय्धाःसा हुसेन चरमपन्थी मुस्मांतय्त समर्थक जक मखु अप्रत्यक्ष रुपं ग्वाहालि तकं यानाच्वंम्ह खः ।

अफगान व इराकयात अमेरिकां ध्वस्त याये सातकि चरमपन्थी मुश्मांतय्सं नं थःगु रणनीति परिवर्तन याना यंकूगु खनेदु। अथे धयागु न्हापा थें ल्वाभः व बम ज्वनाः आतंकित यायेगु त्वःताः नरम नीति ज्वंगु खनेदु। नरम नीति धइगु मुश्लिम सिद्धान्तयात समर्थन यानाः सत्ता कब्जा यायेगु नीति खः। अरब राष्ट्रया ट्यूनेसिया व इजिप्टय् अमेरिका समर्थक सरकारयात ध्वस्त यानाः आः मिलिजुलि सरकार चले यानाच्वंगु दु। मिले जुयाः न्ह्याकूगु न्हूगु सरकारय् मुश्लिम सिद्धान्त ज्वना वःपिं न्हापाया चरमपन्थी मुश्लिमया बाहुल्य खनेदु। थ्व निगू देय् धुंकाः आः खाडी लागाया यमन, बहराइन, साउदी अरबय् नं अमेरिका समर्थन सरकारया विरुद्ध तच्वयेक संघर्ष यानाच्वंगु दु। मेखे अरब राष्ट्रया सिरिया व लिबियाय् अमेरिका विरोधी शासकया विरुद्ध नं प्रजातन्त्र व मानव अधिकारया नामं तच्वयेक आन्दोलन जुयाच्वंगु दु। थ्व निगू देशया आन्दोलनकारीतय्त अमेरिकां तःधंगु ग्वाहालि व समर्थन न याना वयाच्वंगु दु। विशेष यानाः लिबियाया विद्रोहीतय्त अमेरकापाखें आर्थिक व ल्वाभः लगायत मेमेगु नं माक्व ग्वाहालि यानाच्वंगु दु। लिबियाय् गद्दाफी विरुद्ध ल्वाभः ज्वनाः सतकय् कुहां वयाच्वंपिं अल कायदाया लडाकुत खः धकाः स्वयं गद्दाफीं जक मखु मुस्मां बुद्धिजीवीतय्सं नं द्वपं बिया वयाच्वंगु दु ।

लिबियाया विद्रोहीं अल कायदाया लडाकुतय्त ग्वाहालि यानाच्वंगुलिं मुस्मांतय्सं धायेगु नं याना हल, बिन लादेनं गुलि नं ज्या न्ह्याकल उकिं यानाः मुस्मांतय्त हानी व अमेरिकायात फाइदा जुयाच्वंगु दु। थ्वहे कारणं लादेन अमेरिकाया एजेन्ट खः लाकि धकाः नं शंका यात। मुश्लिम बुद्धिजीवीतय्सं थ्व नं धायेगु याना हल कि यदि लादेनयात खत्तम याये माःसा न्हापा हे यायेफु।छाय्धाःसा लादेन पाकिस्तानय् दु धयागु खँ अमेरिकां मसिउगु मखु। लादेनयात अमेरिकां हथाय् चायाः हत्या याःगुया निता कारण दु। छगू मुस्मांतय्सं आतंकवादीया लँय् मवँसे मुश्लिम सिद्धान्त ज्वनाः न्ह्याः वनाच्वंगुलिं खःसा मेगु कारण अमेरिकाया रष्ट्रपति चुनावया निंतिं न्हूगु मुद्दा ज्वनाः जनताय् वनेगु निंतिं खः ।

drkhadgi@gmail.com

More Stories Like this