संविधानसभाया म्याद थपे यायेगु प्रस्ताव

अन्ततः सरकारं संविधानसभाया म्याद मेगु दछि थपे यायेगु धकाः संसदय् प्रस्ताव दर्ता याःगु दु। संविधानसभाया म्याद थपे यायेगु लाकि मयायेगु धकाः विवाद जुयाच्वंगु इलय् प्रधानमन्त्री झलनाथ खनाल विदेश भ्रमणं नेपाः थ्यनाखतं हे संविधानसभाया म्याद थपे यायेगु प्रस्ताव दर्ता याःगुलिं विपक्षी पार्टीत तम्वयाच्वंगु दु। खास यानाः संविधानसभाया म्याद थपे याये मखु धकाः अडान कयाच्वंगु नेपाली कांग्रेसयात थुकिं दथुइ काका बिउगु दु। संविधानसभाया म्याद दछि थपे यायेत संविधान संशोधन यायेमाःगु व उकिया लागिं दुई तिहाई बहुमत माःगु कारणं थ्व प्रस्ताव पारित यायेत कांग्रेसया नं समर्थन दयेमाःगु जुया बी। अथे खःसां सत्तापक्षं माल धाःसा कांग्रेसया मत मदुसां नं थ्व प्रस्ताव पारित याये फइगु विश्वास यानाच्वंगु दु ।

संविधानसभा थौंकन्हय् देशय् विद्यमान छगू जक निर्वाचित निकाय जूगुलिं उकियात भंग यायेगु कांग्रेसयात सिद्धान्तं बिउगु खँ मखु। मदुम्ह गिरिजा प्रसाद कोइरालां भंग जूगु संसद पुनर्स्थापनाया लागिं अपाय्धंगु आन्दोलन याःगु सकस्यां सिउगु हे खँ खः। छुं जुयाः संविधानसभा भंग जुल धाःसा आः कायम जुयाच्वंगु वामतय् सरकार ताःई न्ह्याः वनी, थ्व नं कांग्रेसया लागिं उत्पादक मखु। अज्याःगु अवस्थाय् माओवादीं सत्ता कब्जा याइ धइगु गुगु फोबिया कांग्रेसयाके दुगु खः, व झन् हे तीव्र जुया वइ। कांग्रेसया थ्व मानसिकता सरकारं बांलाक हे थू। तर संविधानसभाया म्याद थपे जूसां नं संविधान दयेकीगु ग्यारेन्टी धाःसा अझ नं मदुनि, थ्व मेगु विडम्बना खः। उकिं म्याद थप लोकप्रिय प्रस्ताव मजुइगु निश्चित दु ।

More Stories Like this