भिलेन जुइ न्ह्याःम्ह हिरो

शिला साय्मि

थौंकन्हय् आपालं आपाः नेवाः फिल्म दयेकेगु ज्याय् सुरेन्द्र तुलाधर लिमलाक ब्वाँय् जुयाच्वंगु दु। आधुनिक ई व पुलांगु संस्कृति ल्वाकछ्यानाः सकस्यां ययेक फिल्म दयेकेगु हे वय्कःया विशेषता खः। आः तक थम्हं हे च्वयाः व निर्देशन यानाः प्यंगू फिल्म दयेकादीधुंकूम्ह वय्कः थौंकन्हय् हानं न्हूगु फिल्म दयेकेगु ज्याय् हे व्यस्त जुयादी ।

२०२६ सालय् मां शारदादेवी व अबु गणेशबहादुरपाखें येँया ढोका टोलय् वय्कःया जन्म जूगु खः। आइकम ब्वँब्वं हे फिल्मय् लगे जुल। ब्वनेगु त्वःफित। गुलिस्यां साहित्य च्वयाः भाषाया सेवा याइ, गुलिस्यां संगठन चायेकाः सेवा याइ, वय्कलं फिल्म दयेकाः सेवा याना च्वनादीगु दु।
२०४७ सालय् दकलय् न्हापां 'उ फेरि आउँछ' धइगु खय् भाय्या पूधाः प्याखं म्हिताः दबुली पलाः तयादीम्ह वय्कः वयां लिपा श्रीकृष्ण 'अणु'या 'वल वल' धइगु ख्यालःपाखें नेपालभाषाया दबुली दुहां झाःगु खः। अनंलि अणुया हे मेमेगु ख्यालः लिसें सँझ्याः साहित्य पाःलाःपाखें याइगु थीथी नाटकय् वय्कलं म्हितादिल ।

आपालं नाटकय् नायक जुयाः म्हितेधुंसां थःत धाःसा खलनायक हे जुइ यःगु वय्कःया धापू दु। खतुं वय्कलं अप्वः यानाः हास्य कलाकार जुयाः म्हितादीगु दु।
२०५२ सालय् वयाः वय्कलं न्हापांखुसी 'मिसातय्गु आंग्सा' नांगु ख्यालः नं च्वयादिल। वयां लिपा फिल्मया स्त्रिप्ट च्वयेगुपाखे च्वसा न्ह्याकादिल। थौंतक वय्कलं च्वयाः थःहे म्हितादीगु प्याखंत नीन्यागू स्वयां अप्वः दयेधुंकल। थौंकन्हय् इमेज च्यानलं प्रसारण जुयाच्वंगु 'ख्वताबजि' वय्कःया ब्राण्ड सिरियल जुयाच्वंगु दु। २०६१ सालंनिसें वय्कलं 'ख्वताबजि' या निंतिं टेलिफिल्म च्वयेगु, निर्देशन यायेगु व म्हितेगु याना वयाच्वंगु दु ।

उकिया नापनापं वय्कलं बुद्ध धर्म सम्बन्धी पूधाः प्याखं 'तथागत'या नं सफल निर्देशन यानादीगु खः। उगु पूधाः प्याखनं थःत तःधंगु हे सन्तोष दुगु खँ वय्कलं कनादी। निर्देशनया लागिं गनं नं तालिम मकयासां प्रेरणाया श्रय धाःसा शुभशान्ति बज्राचार्ययात बियादी ।

'अंश', 'जिपिं बदमास मखु', 'याकः म्ह्याय्' व 'जिगु मिखाया न्ह्यःने' धुंकाः थौंकन्हय् वय्कः 'मीस पानवती' दयेकेगु तयारीइ दु ।

प्रत्येक स्त्रिप्ट वा संकिपाय् छगू सन्देश ला अवश्य नं दइ। 'याकः म्ह्याय्'लय् म्ह्याय् मचायात थें हे भौमचायात नं उलि हे अधिकार माः धइगु सन्देश बियादीगु दु। 'अंश'य् ध्यबा हे जक सकतां मखु, ध्यबा स्वयां छेँजःया माया उप्वः दु धइगु सन्देश दुसा 'जिपिं बदमास मखु' लय् लिपा हे जूसानं मखुगु ज्या यात धाःसा सजायँया भागिदार जुइ हे माः धइगु सन्देश दु ।

थौंकन्हय् नेवाः फिल्मत नेवाः पह मवः धाइ। थुकी वय्कःया बिचाः दु, 'ई कथं हिला वं थें फिल्म नं हिले हे माः। छगू पुस्तायात पुलांगु पहः यइ मखु उकिं खुकुरी चुपिया थासय् पेस्तोल छ्यलेमाल। अथे हे मिसातसें नं जुडो कराते स्यनाच्वंगु दु उकिं मिसातय्गु नं फाइट सिन आवश्यक जुयावल। यदि मजुल धाःसा झी अझ नं पुलांगु हे बिचालय् लानाच्वन धइगु द्वपं वइ। छम्ह निर्देशकं थुज्वःगु दक्वं खँ बिचाः यायेमाः ।'

'निर्देशन बांमलात धाःसा स्त्रिप्ट व पात्र न्ह्याक्व हे बांलायेमा, फिल्म बांलाइ मखु' वय्कलं तनादी। खय् भाय्या फिल्म स्वयां नेवाः फिल्म यक्व हे स्तरीय जूगु वय्कःया दावी दु। नेवाः फिल्मय् थःगु मौलिक भाय्, संस्कृति, भेषभुषा व परिवेश दु। खय् भाय्या फिल्म हिन्दीं अप्वः प्रभावित जुयाच्वंगु दइ ।

छगू फिल्म दयेकेत ५ निसें ८ लाख तू। तर थःपिं धाःसा ध्यबाया लागि मखुसें भाषा प्रेमं यानाः थुकी पानाच्वनागु खँ नं वय्कलं कनादी। यदि स्वकुमितय्सं नेवाः संकिपायात माया यानाः स्वयाबिल धाःसा, सी.डी, भिसीडी न्यानाबिल धाःसा व संकिपा ख्यःया जःपिंत हःपाः बियादिल धाःसा थुगु ख्यः लजगाःया रुपय् नं वनेफुगु वय्कःया बिचाः दु।
फिल्म ख्यलय् नं निर्देशनय् थःत सफलता चूलाःगु खँय् गौरव तायेकादीम्ह वय्कलं आः खय् भाय्या फिल्म नं निर्देशन यायेगु ग्वसाः दुगु खँ कनादी ।

२०६६ सालया पेज ३ एवार्डय् वय्कलं बेस्ट डाइरेक्टरया सिरपाः त्याकादीगु खःसा २०५४ सालय् पलिस्थापाखें जूगु ख्याल कासाय् न्हाप सिरपाः नं त्याकादीगु खः। 'तर थ्व फुक्क मध्ये नं स्वकुमितय्सं याइगु मतिना जिगु दकलय् तःधंगु सिरपाः खः' वय्कलं धयादी ।

More Stories Like this