स्वस्थ जुइगु नितिं ब्वाज्या कासा

धरान (झीगु स्वनिगः)

न्हियान्हिथं ब्लड पे्रसर व डाइबिटिजया ल्वगित अप्वयाः वयाच्वंगु अवस्थाय् शारीरिक स्वस्थ्य दयेकेगु मू उद्देश्यं हरेक शनिबाः सुनसरीया धरानय् न्ह्याइगु धरान रन ज्याझ्वः अन्तर्गत निगूगु वाःया ब्वाज्या क्वचाःगु दु । शनिबाः जूगु ब्वाज्या धेंधेंबल्लाः कासाय् न्यय्म्ह मिसा लिसे मिजंतय्सं ब्वति काःगु खः । यलम्बर खेल मैदानंनिसें न्ह्याःगु उगु धेंधेंबल्लाः कासाय् मिजंपाखे झिंच्यादँया सुशन राईं १४ मिनेट २७ सेकेण्डय् साढे ३ किलोमिटर पार यानाः न्हाप लाकेत ताःलाकूगु खः । अथेहे नीस्वदँया प्रकाश तामाङ्ग ल्यू व झिंच्यादँया सुमनकुमार राई लियांल्यू लाःगु खः ।

अथेहे मिसापाखे नीन्यादँया विगेन्स राईं २१ मिनेट ८ सेकेण्डय् उगु दूरी पार यानाः न्हाप लाकूगु दु । अथेहे स्वीदँया हेमा राई ल्यू व नीखुदँया शीला राई लियांल्यू लाःगु दु । युके पार्क रनया प्रतिनिधि लिसे धरान रनया संयोजक सन्तोष राईया कुतलय् धेंधेंबल्लाः कासा जुयाः वयाच्वंगु खः । वंगु वाः याःगु धेंधेंबल्लाः कासाय् स्वीन्याम्ह मिसा लिसे मिजंतय्गु ब्वति दुगु खः । न्हियान्हिथं अप्वयाः वनाच्वंगु ब्लड प्रेसर व डाइबिटिजया समस्यायात निराकरण यायेत ज्याझ्वः यानाःगु संयोजक राईं जानकारी बियादीगु खः ।

स्वस्थ व सकारात्मक बिचाः हयेगु नितिं धरान रन ज्याझ्वःया ग्वसाः ग्वयाःगु जानकारी ब्यूसें रनिङ्ग मयाइपिं मनूत ल्वय्या भण्डार जुइगु यानाच्वंगुलिं म्होनिं छवालय् प्यक्वःतक्क ब्वांय् वनेगु थःगु स्वास्थ्यया नितिं फाइदाजनक जुइगु स्वास्थ्य विज्ञपिनिगु धापू दु ।

More Stories Like this