स्थानीय निकायया निर्वाचन यायेमाः स्थानीय विकास मन्त्री अर्याल
येँ (झीगु स्वनिगः)
स्थानीय विकासमन्त्री उर्मिला अर्यालं ताःहाकःगु इलंनिसें अस्तव्यस्त दुगु स्थानीय निकायलय् अन्तरिमकालया नितिं निर्वाचन यायेमाःगु धयादीगु दु । छगू सञ्चार माध्यमलिसे खँल्हानादिसें मन्त्री अर्यालं स्थानीय निकायया निर्वाचन सम्वन्धि प्रस्ताव याकनं हे मन्त्री परिषद्य् यंकेगु धयादीगु दु । तर थुकिया नितिं फुक्क दलतय्गु सहमति माःगु अर्यालं बिचाः प्वंकादीगु खः । स्थानीय निकायलय् जूगु अनियमितताया बारे विवरण संकलन ज्या जुयाच्वंगु जानकारी बियादिसें मन्त्री अर्यालं थ्व सम्वन्धि याकनं हे न्हूगु अवधारणा सार्वजनिक याइगु नं धयादीगु दु ।
नेपालय् स्थानीय निकायया निर्वाचन थ्यंमथ्यं झिंनिदँ न्ह्यःनिसें जुइमफयाः स्थानीय निकाय जनप्रतिनिधि विहीन जुयाच्वंगु दु । सर्बसाधारणया न्हियान्हिथंया ज्यात नापं प्रभावित जूगु दु । स्थानीय निकाय सरकारी कर्मचारीया भरय् न्ह्याःसां नं पर्याप्त कर्मचारी मदयाः समस्या जूगु दु ।
