संविधानसभाया ई तंकेगु नितिं प्रधानमन्त्री खनाल सक्रिय
येँ (झीगु स्वनिगः)
सविधानसभाया ई तनेगु प्रस्ताव यायेवं थीथी प्रतिक्रियात वयाच्वंगु इलय् प्रधानमन्त्री झलनाथ खनालं थीथी दलया नेतातलिसे ब्यागलं ब्यागलं सहलह यानादीगु खः । प्रधानमन्त्रीया सरकारी निवास बालुवाटारय् शनिवाः वय्कलं संविधानसभाया निगूगु तःधंगु दल नेपाली कांग्रेसलिसे सहलह यानादीगु खः । कांग्रेस संसदीय दलया नेता रामचन्द्र पौडेललिसे जूगु नापलाये ज्याय् संविधानसभाया ई तनेगु, शान्ति प्रक्रिया व संविधान दयेकेगु बारे खँल्हाबल्हा जूगु प्रधानमन्त्रीया प्रेस सल्लाहकार सूर्य थापां जानकारी बियादीगु खः । नापलाये ज्याय् खनालं संविधानसभाया ई तनेगुया विकल्प मदुगुलिं सहमतिइ वयेत कांग्रेसयात इनाप यानादीगु खः ।
लिसलय् पौडेलं जेठ १४ गते न्ह्यः संविधानया अन्तरवस्तु मिलय् यायेगु तयारी यायेमाःगु व माओवादी जनसेनाया समायोजनया खाका वयेमाःगु धयादीगु खः । शान्ति प्रक्रियाय् छु नं प्रगति जूसा कांग्रेस संविधानसभाया ई तनेगु पक्षय् दुगु पौडेलं स्पष्ट यानादीगु स्रोतं जानकारी ब्यूगु खः । थ्व स्वयाः न्ह्यः प्रधानमन्त्री खनालं सद्भावना आनन्दीदेवी, नेपाः राष्ट्रिय पार्टी व राष्ट्रिय जनमुक्ति पार्टी लगायतया चीधंगु दलया नेतातलिसे सहलह यानादीगु खः । शान्ति प्रक्रिया, संविधान दयेकेगु, संविधानसभाया ईया बारे दलतय्गु बिचाः थुइकाः सरकारं छुं दिं दुने हे छगू खाका सार्वजनिक यायेगु तयारी याःगु दु ।
