पाटन संग्रहालयया राजस्व थहांवन

यल (झीगु स्वनिगः)

पाटन संग्रहालय स्वःवइपिं पर्यटकतय्गु ल्याः वृद्धि लिसे न्हियान्हिथंया टिकट बिक्री बापत राजस्वय् न्ह्यःथनेबहःगु वृद्धि जूगु धाःगु दु । पाटन संग्रहालय विकास समितिया तथ्याङ्क कथं आर्थिक दँ २०६६/६७ सं नीन्यागू लख दुगुलिइ आर्थिक दँ २०६७/६८ या चैत मसान्ततक्कयादुने स्वीन्यागू त्या लख राजस्व सङ्कलन जूगु दु ।आर्थिक दँया थुगु अवधिइ चैत मसान्तय् दकले अप्वः राजस्व सङ्कलन जूगु खः । उगु अवधिइ प्यंगू त्या लख सङ्कलन जूगु जानकारी ब्यूगु खः ।

आर्थिक दँया शुरुवात साउन महिनाय् दकले म्हो स्वीन्याद्वः तका जक सङ्कलन जूगु खः । नेपालं पर्यटन दँया घोषणा यायेधुंकाः संग्रहालय अवलोकन याःवइपिं पर्यटकया आगमनय् वृद्धि जुइधुंकाः टिकट बिक्री बापत राजस्व वृद्धि जूगु संग्रहालयया कार्यकारी निर्देशक देवेन्द्रनाथ तिवारीं धयादिल । संग्रहालयसं न्हियान्हिथं निसः व न्यय्म्हसिया ल्याखय् पर्यटक दुहांवयेगु यानाच्वंगु दु । लिपांगु इलय् दकले अप्वः चैत महिनाय् निद्वः स्वयाः आपालं पर्यटकं संग्रहालयया अवलोकन याःगु खः ।

More Stories Like this